Lejoi daljen e kontejnerit pa e kontrolluar, arrestohet doganieri në Portin e Durrësit

Përgjegjësi i turnit në Portin e Durrësit ka rënë në prangat e policisë, pasi lejoi daljen e një kontejneri i cili duhet të ishte kontrolluar.

Sipas policisë, kontejneri ishte markuar nga skaneri, me shenjë të verdhë, shenjë e cila përbën detyrim për t’u kontrolluar nga punonjësi i degës doganore.

Burime nga grupi hetimor për Report Tv thanë se 52-vjeçari H.L e ka neglizhuar pa ndonjë qëllim dashakeq rastin në fjalë dhe këtë e ka pranuar përpara hetuesve kur është marrë në pyetje.

Sakaq janë hapur kamerat e sigurisë për t’u siguruar që kontejneri në fjalë nuk është hapur gjatë kësaj kohe dhe janë ushtruar kontrollet e duhura në vijim, ku nga kontejneri nuk është konstatuar asnjë problematikë apo dyshim.

Kontejneri në fjalë është markuar për kontroll në skaner në kuadër të kontrolleve rutinë që kryhen në Portin e Durrësit, për riskun e kalimit të lëndëve narkotike apo produkteve të tjera kontrabandë.

“Specialistët e Seksionit për Kontrollin e Kontejnerëve në PKK Port Durrës arrestuan në flagrancë shtetasin H. L., 52 vjeç, banues në lagjen nr. 1, pasi teksa ishte në detyrë, përgjegjës turni në degën doganore të portit të Durrësit, ka lejuar të dalë nga zona e portit, një kontejner që ishte markuar nga skaneri, me shenjë të verdhë, shenjë e cila përbën detyrim për t’u kontrolluar nga punonjësi i degës doganore”, sipas njoftimit të policisë.

M.Q./r.k./Shqiptarja.com

TAG:
• porti i durresit
• Durres