Leskaj në shtëpinë e të moshuarve në Vlorë: Pensionistët janë harruar, braktisur dhe nëpërkëmbur nga pushteti vendor dhe qendror

VLORË- Drejtuesi Politik i qarkut Vlorë, Bujar Leskaj ishte në qendrën Multifunksionale e të moshuarve dhe e pensionistëve, duke akuzuar se janë lënë të braktisur nga pushteti vendor e ai qendror.

Sipas tij, kjo gjendje e të moshuarve është një tregues se kjo qeveri duhet të ikë sa më shpejt.

“E dhimbshme të dëgjoje pensionistët, të cilët i kanë dhënë Shqipërisë një jetë të tërë, të ndihen të braktisur nga shteti, pa përkrahje, pa solidaritet. E turpshme të dëgjoje nga kryetari i shoqatës, z. Selami Likaj, për harresën, injorimin, braktisjen e kësaj kategorie nga shteti këto tetë vite.

LEXO EDHE:
Gjipe/ Po ndërtonin 4 beach bar-e pa leje, arrestohet një person, në kërkim 3 të tjerë

Gjendja e tyre është akuzë për këtë pushtet në ikje, për këta pushtetarë fasadash e mashtrimesh, që i gënjejnë pensionistët me premtime e lugë bosh.

Mungesë fondesh, ambiente të shkatërruara, të ftohta, pa ngrohje, pa pastrim, pa ujë të pijshëm, pa kushtet më minimale për këta njerëz të moshës së tretë që jetojnë në vetmi.  Kultura e një kombi dëshmohet tek respekti që tregon për të moshuarit; fytyra e një qeverisjeje dallohet tek trajtimi që u bën të moshuarve! E pra, në këto 8 vite të qeverisjes së këtij sekti, shqiptarët në përgjithësi dhe pensionistët në veçanti janë harruar, braktisur, nëpërkëmbur!" - u shpreh Leskaj.

B.K./Shqiptarja.com

TAG:
• Vlore
• PD
• bujar leskaj
• Fushate elektorale
• zgjedhjet parlamentare 2021