Librat e humbur të Konicës, Alibali
ia kthen Bibliotekës Kombëtare /Foto

Biblioteka e Faik Konicës, që ende konsiderohet e humbur, numëron rreth 2000 tituj. Disa nga librat e tij janë gjetur në SHBA falë pasionit, punës kërkimore shumëvjeçare të studiuesit Agron Alibali.

Kolekionisti i sjell në Tiranë në përgjigje të amanetit të vetë Konicës për t’ia besuar Bibliotekës Kombëtare. Janë disa nga librat e ccmuar të tij si: “Popolo, lingua e letteratura albanese” e Gaetano Petrotës, edicioni luksoz i “Lahutës së Malcis” dhuruar po me dedikim latinisht nga vetë Gjergj Fishta, i shndërrojnë këto libra në bartës afektesh të shumëfishta, të cilave u shtohen edhe ato të bashkohësisë sonë.



Librat e gjetur prej bibliotekës së Konicës bartin etiketën e famshme “Ex Libris” dhe autografe dedikuese të autorëve për vetë Konicën, të cilat janë edhe një e veçantë identifikuese e kësaj biblioteke të famshme. Studiuesi Agron Alibali u shpreh se “librat ishin një ndër pasionet dhe dashuritë e Konicës. Biblioteka e Konicës, pas vdekjes së tij, u ruajt në Katedralen e Shën Gjergjit në Boston, deri në vitin 1965. Më pas, gjurmët e saj humbën, dhe kjo bibliotekë ende konsiderohet e humbur”.



Duke kujtuar rrugëtimin e punës së tij kërkimore zt. Alibali u shpreh se “në vitin 2004 pata rastin të identifikoj në zyrat e shoqatës “Vatra” në New York librin e parë të humbur të bibliotekës së Faik Konisë, botimin e studiuesit arbëresh Gaetano Petrotës.

Më pas, kjo këmbëngulje më çoi në zbulimin e tre librave, në fondin e librave të familjes Panariti, të cilët mbartin edhe vlera historike pasi bashkojnë Fishtën, Asdrenin, Lef Nosin, Magaret Hascluck, Mahir Domin, si dhe shumë personalitete të tjera”.



Studiuesi Agron Alibali së shpejti do të botojë edhe një monografi për Faik Konicën, mbështetur edhe në arkivën e tij diplomatike të zbuluar para disa kohësh në Itali.

Prezantimi për herë të parë të këtyre librave të çmuar u shoqërua edhe me ekspozimin e një pjese modeste të fondit arkivor të BKSH-së, të gazetës “Albania”, letërkëmbimit të Faik Konicës me at Shtjefën Gjeçovit si dhe botime të disa prej vepra të tij.