I forti i Sukthit në makinë me Ndojën! Gruaja avokate e prokurorit fitoi gjyqin për tokën në Lalz, më pas iu shit 'Rrumit'

Një ngjarje e rëndë ishte ajo e dhunimit të avokatit Ilia Ilia në Durrës në korrik të 2018-ës, një ditë fill pas një përplasje që ai pati në një seancë gjyqësore ku i akuzoi disa persona pjesë të grupit që drejtohet nga prokurori Arjan Ndoja. Gazetari i Shqiptarja.com, Elton Qyno, tha sonte në "Repolitix", se pikërisht pas këtij konflikti në sallë, avokati u dhunua, dhe aktualisht në gjykim ndodhet vetëm një person. Ndërsa dosja për prokurorin Ndoja, i cili u kallëzua penalisht nga avokati Ilia Ilia si porositës i dhunës, është veçar. Dosja nuk është pezulluar -tha gazetari Qyno - dhe se prokurori Ndoja është ende në hetim për këtë çështje.  

"Në Gjykatën e Durrësit është një dhunë e ushtruar fill pas një dite që avokati Ilia Ilia kishte përfunduar në seancën gjyqësore ku ishte konfliktuar me disa persona që i akuzon si pjesë të grupit që drejtohet nga Arjan Ndoja. Njëri nga personat që ka ushtruar dhunë është marrë i pandehur dhe është dërguar për gjykim, por për prokurorin klallëzimi është veçuar dhe i është kaluar një prokurori tjetër. Nuk ka asnjë vendim pezullimi, për të vazhdojnë akoma hetimet", tha gazetari Qyno në emisionin Repolitix në Report Tv.

Në atë kohë, avokati tha se njëri nga agresorët ishte shoferi që prokurori Arjan Ndoja kishte në atë kohë, Mondi Voga, i cili e ka goditur me grushte.

Momenti kur sulmohet avokati Ilia Ilia, fiksuar nga kamerat e sigurisë

Zyra e avokatisë së bashkëshortes së prokurorit Arjan Ndoja ka përfaqësuar në gjyq për çështjen e pronave në Gjirin e Lalzit, 75-vjeçarit Pal Seçuni, pas të cilit dyshohet të fshihej Landi Muharemi. Bëhet fjalë për 45 mijë metra katrorë në Gjirin e Lalzit, për të cilën Bashkia e Durrësit pretendonte të ishte tokë shtetërore dhe jo private, dhe që i kishte dhënë leje për investim (resort) një biznesmeni libanez  Faad Mitri. Në këtë çështje, ish-kryegjyqtarja e Durrësit, Joana Qeleshi që së fundi dha dorëheqjen pa u futur në vetting, i dha të drejtë të moshuarit me avokatë nga studio e bashkëshortes së prokurorit Ndoja. Pikërisht ky vendim u bë shkak që biznesmeni libanez të dhunohej dhe të detyrohej të largohej nga Shqipëria, duke hequr dorë njëkohësisht nga investimi.

"Rasti konkret kur gruaja e tij ka përfaqësuar një gjyq civil, bëhet fjalë me bashkinë e Durrësit ku ka përfaqësuar Pal Seçunin, që ka pasur nga pas persona të fisin Muharremi në zonën e Sukthit, dhe është fituar pikërisht nga studio e avokatisë së gruas së prokurorit, gjyqi që solli rrahjen barbare të biznesmenit libanez", tha gazetari i Shqiptarja.com, Elton Qyno, i ftuar në emisionin "Repolitix" në Report Tv, me moderator Denis Mingën. Biznesmeni do të ndërtonte kompleksin përmes strategjisë për të rritur investimet, 1 euro për metër katror. Por pas vendimit të Gjykatës, i cili nuk u apelua, toka që pretendohej shtetërore u kthye në private në pronësi të të moshuarit. Aktualisht kjo pronë është në duart e Muharremajve në Sukth, pasi gazetari Elton Qyno tha se Pal Seçuni pas fitores së gjyqit ja ka shitur tokën disa personave që kanë lidhje me grupin e Muharremajve në Sukth.

Sa i përket dosjeve të gjetura në makinën e prokurorit Arjan Ndoja, që u gjetën nga ekspertiza në makinë pas atentatit në Mbikalimin e Shkozetit, gazetari Elton Qyno tha se ato janë të studios ligjore të bashkëshortes së prokurorit, ndërsa hodhi dyshime edhe për disa dokumente nga dosjet që u vodhën në 2018 në Prokurorinë e Durrësit. Vetë prokurori Ndoja në një reagim për mediat ditën e sotme nga spitali, i qëndroi pikërisht kësaj linje, se janë dosje në të cilët është e përfshirë studio e tij ligjore.

"Dosjet merren në shtëpi për shkak të mbingarkesës. I marrin në shtëpi dhe përgatisin konkluzionet përfundimtare apo për apelimi. Janë gjendur dosje që kishte në proces bashkëshortja e prokurorit, e cila ka zyrë avokatie. Arjan Ndoja nuk ka hetuar çështje pronash, apo të gjyqtarit Skerdilajt Konomi, që është vrarë në Vlorë, pasi kjo dosje është në prokurorinë e krimeve të rënda. Në makinë dyshohet të jenë gjetur dokumente që dyshohet të jenë vjedhur në prokurorinë. Disa dokumente, por jo të gjitha përkojnë me dosjet e vjedhura që kishte në dorë prokurori Afrim Shehu i cili ka hetuar çështje pronash në Gjirin e Lalzit", tha në Repolitix gazetari i Shqiptarja.com Elton Qyno.

Dyshimet janë se ato dosje, janë dokumente që u grabitën nga Prokuroria e Durrësit në maj të vitit 2018, nga persona që ende sot nuk janë identifikuar. Këto dokumente të vjedhura ishin dosje korrupsioni, që lidhen me pronat, mes të cilave edhe ajo e abuzimit me pronat dhe plazhet publike në Ishëm dhe te Gjiri i Lalzit, ku u arrestuan dhe katër ish-zyrtarë të shtetit, mes të tyre dhe ish-kryetari i Komunës Ishëm.

Prokurorit Arjan Ndoja 4 ditë më parë ju bë atentat teksa ishte në makinë me Landi Muharremin, njohur si i forti i Sukthit, ku të dy mbetën të plagosur së bashku me shoferin Andi Maloku, ish-polic në komisariatin e Krujës.