Ligjvënësit republikanë do të propozojnë një paketë ndihmash ushtarake prej 17.6 miliardë dollarësh për Izraelin dhe për plotësimin e arsenalit amerikan, por që përjashton ndihmën e mëtejshme për Ukrainën. Ky propozim nxjerr në pah sfidat me të cilat përballen mbështetësit e një projektbuxheti gjithëpërfshirës për sigurinë kombëtare, ku do të duhet të përfshihen edhe miliarda dollarë për zbatimin e ligjeve të emigracionit.
Ky projektligj i jep mundësinë kryetarit të Dhomës së Përfaqësuesve Mike Johnson dhe ligjvënësve republikanë për të treguar mbështetje për Izraelin, megjithëse ka pak shanse që të miratohet nga Senati. Ndërkaq, teksti i një kompromisi më të gjerë në Senat pritej të publikohej këtë fundjavë dhe një votim i rëndësishëm pritej të mbahej gjatë javës që vjen për këtë paketë tjetër.
Zoti Johnson tha se drejtuesit e Senatit janë të ndërgjegjshëm se duke mos përfshirë Dhomën e Përfaqësuesve në negociatat e tyre, kanë eliminuar kështu mundësinë e një shqyrtimi të shpejtë të legjislacionit të propozuar.
“Siç kam thënë vazhdimisht gjatë tre muajve të fundit, Dhoma e Përfaqësuesve duhet të vendosë për qëndrimin e saj për këto çështje dhe përparësitë tona duhet të trajtohen”, u shpreh zoti Johnson në një letër drejtuar kolegëve ligjvënës.
Dhoma e Përfaqësuesve miratoi në nëntor një paketë ndihmash ushtarake prej 14.5 miliardë dollarësh për Izraelin, që Senati nuk pranoi ta marrë në shqyrtim. Republikanët gjithashtu këmbëngulën që fondet për ndihmën të merreshin nga shkurtimet buxhetore në sektorë të tjerë. Projektligji kërkonte që të shkurtohej buxheti i agjencisë së taksave, IRS, megjithëse zyra e pavarur për buxhetin e Kongresit tha se kjo do të sillte një kosto neto prej 12.5 miliardë dollarësh për qeverinë federale për shkak të humbjeve nga problemet që do të shkaktoheshin në mbledhjen e taksave.
Taktika e përfshirjes së shkurtimeve për IRS-në e bëri propozimin edhe më partiak, duke u votuar me 226 vota pro dhe 196 kundër. Zoti Johsnon u shpreh në letrën drejtuar ligjvënësve se heqja e shkurtimeve të propozuara do të mundësonte miratimin e shpejtë të ndihmës për Izraelin.
“Gjatë debatit në Dhomën e Përfaqësuesve dhe në deklaratat e shumta që pasuan, demokratët e bënë të qartë se kundërshtimi i tyre kryesor ndaj projektligjit fillestar në Dhomën e Përfaqësuesve kishte të bënte me shkurtimet”, tha zoti Johnson. “Senati nuk do të ketë më justifikime, sado të padrejta, kundër miratimit të shpejtë të kësaj mbështetjeje të rëndësishme për aleatin tonë”.
Ligjvënësi republikan Ken Calvert publikoi tekstin e projektligjit për ndihmën ushtarake për Izraelin. Propozimi ofron 4 miliardë dollarë për plotësimin e rezervave të ezauruara të raketave për mbrojtjen kundërajrore dhe 1.2 miliardë dollarë për mbrojtjen nga raketat me rreze të shkurtër dhe mortajat. Ka gjithashtu fonde për blerjen e sistemeve të avancuara të armëve dhe për të rritur prodhimin e artilerisë dhe municioneve të tjera.
Për t’u siguruar se kjo ndihmë nuk do të kompromentojë gatishmërinë ushtarake të Shteteve të Bashkuara, propozimi përmban 4.4 miliardë dollarë për të plotësuar rezervat e armatimeve që do t’i jepen Izraelit. Në projektligj përfshihen edhe 3.3 miliardë dollarë për operacionet e tanishme amerikane në rajon./VOA
Lajme të tjera
-
Ylli Pata: Legjendat elektoralo-amerikane të Sali Berishës
25 Dhjetor, 20:00
-
Analiza e VOA: Demokracia në provë në Evropën Lindore mes akuzave për ndërhyrje nga Rusia
25 Dhjetor, 19:34 -
Elon Musk: Mos dhuroni më asnjë qindarkë për Wikipedia-n, kontrollohet nga ekstremi i majtë
25 Dhjetor, 19:23 -
Izraeli dhe Hamasi akuzojnë njëri-tjetrin për dështimin e një marrëveshjeje armëpushimi
25 Dhjetor, 16:57 -
Planet e administratës Trump për t’i dhënë fund luftës në Gazë
25 Dhjetor, 16:49 -
Dyndje për festat! 'Bien' linjat ajrore amerikane, bllokohen mijëra fluturime
25 Dhjetor, 15:55 -
Një mrekulli Krishtlindjesh! Mendonte se ishte fëmijë i vetëm, 75-vjeçari takohet për herë të parë me vëllezërit dhe motrën
25 Dhjetor, 15:44 -
Perëndimi: Vendimet e Parlamentit të Republikës Srpska kërcënojnë rendin kushtetues të Bosnjës
25 Dhjetor, 15:03 -
Trump do të blejë Grenlandën, Danimarka rrit shpenzimet për mbrojtjen e ishullit
25 Dhjetor, 14:06 -
Kërcimi viral i Donald Trump për Krishtlindje (VIDEO)
25 Dhjetor, 13:29 -
Rama në darkën me ambasadorët për festat e fundvitit: Shqipëria nuk ka plan B, vetëm anëtarësimin në BE! Presidenti i ri i SHBA-ve sjell mundësi të reja
24 Dhjetor, 18:26 -
Amerika po planifikon të tërhiqet nga Organizata Botërore e Shëndetësisë
24 Dhjetor, 14:47
