Lista/Çadra e 'vetmisë së madhe'
e gjithë PD po braktis Bashën

Në 18 shkurt, Basha vendosi ngritjen e çadrës me premtimin e krijimit të një “revolte popullore” kundër pushtetit. Megjithatë, 40 ditë më pas, e vetmja revoltë që lideri “de juro” i PD-së ka arritur të ngjallë është ajo brenda vetë partisë së tij.

Asnjëherë më parë, kaq shumë figura brenda PD-së nuk kanë dalë publikisht kundër Bashës, mbi çështjen e bojkotit parlamentar dhe kërcënimit për mospjesmarrjen në zgjedhje.

I fundit që i është shtuar kësaj liste të pakënaqurish, natyrisht për nga radha e jo për nga rëndësia, është vetë Sali Berisha, i cili në disa dalje publike ka shënjestruar qëllimisht Bashën, duke dhënë mesazhin se në “gjuetinë e shtrigave” brenda PD-së, që pritet të pasojë zgjedhjet e 18 qershorit, ai mund të mbështesë kandidaturën e Nishanit për kryetar të ardhshëm të partisë.Kjo është një listë e të gjithë figurave të larta të PD-së, që kanë dalë publikisht kundër liderit të tyre.

Berisha – “Tutori” i Bashës në politikë, përballë dështimeve të këtij të fundit, po përpiqet të krijojë qëllimisht një lloj distance. Në 21 mars, në një takim të papritur me Lu, Berisha publikisht rrëzoi qëndrimin zyrtar të Bashës, duke thënë se PD do të marrë pjesë në zgjedhje.

Një goditje spektakolare, Berisha i dha Bashës edhe me rastin e arrestimit të ish-ministrit të Punës, Spiro Ksera. Menjëherë pas arrestimit, Ristani u nxitua të dilte në një konferencë për shtyp, në të cilën shprehu mbështetjen e PD-së për hetimin në vazhdim.

Vendimi, i pakonsultuar me Berishën u përgënjeshtrua brenda pak orëve. Në një dalje të dytë publike, PD doli në mbrojtje të Kserës dhe konsideroi arrestimin e tij si të motivuar politikisht.

Në mënyrë të ngjashme, në debatin për reformën zgjedhore, Berisha tha në “Ora News” se “sistemi me prim ka disa të meta të mëdha”, në të njëjtën ditë kur Basha ishte shprehur “I hapur” për të pranuar këtë sistem.

Topalli – Nuk është çudi, pasi Topalli është rreshtuar në fillim në kampin e opozitarëve brenda vetë PD-së. Megjithatë, duket se bojkoti i mundshëm i zgjedhjeve ka derdhur kupën e durimit të ish-Kryetares së Parlamentit.

Në një dalje publike, Topalli theksoi se “as në vitin 1997 nuk i bojkotuam zgjedhjet”, ndërsa pranoi se “bojkoti mund të sjellë shuarjen e PD-së”. Në shkurt 2017, Topalli pranoi publikisht në “News 24” se: “Unë kam një tjetër stil të të bërit opozitë nga Bashës. Diçka duhet të ndryshojë”.

Më parë, pas humbjeve të zgjedhjeve lokale të 2015-s, kryeparlamentarja lëshoi disa deklarata therrëse ndaj lidershipit të PD-së, duke thënë se: “Jo vetëm që s’kemi fituar, por kemi bërë një hap të madh pas. Tek vota e kandidatëve jemi minus 11%, humbëm shumicën absolute të bashkive. Duhet të shohim gabimet që kemi tek vetja nga vetja”.

Të tjerët – “Në 3 vitet e fundit, PD ka pësuar 4 humbje, 3 prej të cilave nën drejtimin tuaj kryetar dhe këto nuk mund të shpjegohen thjesht me tezën e blerjes së votave”, i përplasi Selami në fytyrë Bashës, gjatë një mbledhje të grupit parlamentar.

Bregu prej kohësh ka kundërshtuar linjën e drejtimit të Bashës. Në nëntor, ajo ishte e vetme demokrate që sfidon linjën e partisë, duke votuar në Bruksel pro hapjes së negociatave të anëtarësimit. Demokratët e tjerë votuan kundër.

Përsa i përket bojkotit, Bregu paralajmëroi se “nuk i mbledhim dot njerëzit në protesta”, ndërsa në mometin e sulmeve të PD-së ndaj Flekenshtain, kujtoi se: “Ai, në dhjetor 2013, na ndihmoi duke përkrahur 5 kërkesat tona për daljen nga bojkoti parlamentar”.

Bode ka dalë disa herë kundër Bashës, në njërën prej këtyre rasteve e konsideroi qesharak qëndrimin e kryetarit gjatë debatit të ligjit të plehrave, ndërsa Astrit Patozi “rrëzoi” kërkesën për qeveri teknike, duke thënë se “nuk duam fitore në tavolinë”.

Aleatët – Edhe aleatët kryesorë në zgjedhje kanë treguar se nuk frymëzohen prej drejtimit të Lulzim Bashës. Dash Shehi është kundër qëndrimit jashtë Parlamentit. “Nuk mund të ngrihet një alternativë e Parlamentit në shesh”, tha ai.

Ndërsa Nard Ndoka përqeshi deklaratën e Bashës “për çarjen e gomave dhe thyrjen e xhamave”. “Nuk mjafton vetëm shkarkimi i Gëllçit (drejtorit të TVSH-së) dhe shpimi i gomave për të ardhur në pushtet”, tha ai. /Lexo.al

Redaksia Online
Al.N/Shqiptaja.com