Shorti i plotë/ Kombëtarja në Grupin B1, rival me Çekinë, Ukrainën dhe Gjeorgjinë në Ligën e Kombeve! Kosova kundër Rumanisë

Kreu i Federatës Shqiptare të Futbollit, Armand Duka foli pas shortit të Ligës së Kombeve. Kombëtarja shqiptare u shortua në Grupin B1 së bashku me Çekinë, Ukrainën dhe Gjeorgjinë. Për Dukën ai do kishte zgjedhur në grup Anglinë dhe do kishte shmangur Çekinë. Kreu i FSHF-së duket se ka konfirmuar Sylvinhon në stol, ndërsa pritet rinovimi i trajnerit kuqezi.

"Shorti? Janë skuadra të të njëjtit nivel sportiv, i pranueshëm. Janë skuadra të mira, por nuk mund të thuhet se do të ishim më mirë në një grup tjetër. Jemi një grup i balancuar, i vështirë për t’u parashikuar fitues. Grup interesant. Nëse do të kisha zgjedhur me dorë mund të kishte ndryshime, nuk doja Çekinë. Janë të fortë dhe e kemi provuar, do të më pëlqente pse jo Anglia. Është kënaqësi kur luan kundër të mëdhave dhe fiton eksperiencë.

Kur konfirmohet Sylvinho apo ka plan B? Nuk ka asnjë plan B, nuk e mendoj të ndërpres marrëdhënien me stafin. Ka qenë një periudhë e ngarkuar dhe nuk kemi pasur kohë të ulemi dhe të bisedojmë. Kemi para Europianin dhe ai ka qenë i përqëndruar aty, është një sukses i madh edhe për Sylvinhon që nuk është një nga ata tranerët me shumë eksperiemcë. Por, do ta gjejmë mundësinë të diskutojmë edhe për atë që do ndodhë përtej Europianit", tha Armand Duka pas shortit.

Liga e Kombeve ka njohur grupet për edicionin 2024-25. Kuqezinjtë e Sylvinhos do përballen me Çekinë, Ukrainën dhe Gjeorgjinë në Grupin B1 të Ligës B. Tanimë është momenti për të bërë llogaritë kundër rivalëve në grup, me statistikat që janë kokëforta kundër Shqipërisë.

Kundër Çekisë, Shqipëria ka tre fitore, katër humbje dhe një barazim. Duhet thënë se tre herë janë përballur dy skuadrat që pas ndarjes së Çekosllovakisë. Si Çeki, Kombëtarja ka një fitore, një barazim dhe një humbje. Çekët janë rivalë të njohur për tanët, pasi u përballëm dy herë në kualifikueset e Euro 2024, ku kuqezinjtë dolën në vend të parë në grup dhe u kualifikuan në Euro 2024. Barazim 1-1 në Pragë dhe fitore 3-0 për tanët në Tiranë.

Kundër Ukrainës, Shqipëria nuk ka asnjë fitore. Në gjashtë ndeshjet mes tyre, kemi pesë humbje dhe një barazim 2-2 në udhëtim, për kualifikueset e Botërorit (8 tetot 2005).

Kundër Gjeorgjisë, Kombëtarja ka rivalin që është ndeshur më shpesh. Dueli i parë daton në 4 dhjetor 1994. Në Tiranë miqtë fitonin 0-1 për kualifikueset e Europianit. Që atëherë, janë në total 15 ndeshje të luajtura me vetëm 3 fitore për tanët, 4 barazime e plot 8 humbje të regjistruara. Hera e fundit që Shqipëria fitonte ndaj Gjeorgjisë ishte në kualifikueset e Botërorit 2006, kur triumfoi 3-2 në Tiranë.

Pas shortit të Ligës së Kombeve, ku Shqipëria u shortua me Çekinë, Ukrainën dhe Gjeorgjinë në Grupin B1 të Ligës B, foli edhe trajneri i Kombëtares. Sylvinho tha se synimi është vendi i parë, ndërsa tani e ka mendjen te ndeshja me Italinë në finalet e Euro 2024 që do mbahen në Gjermani nga 14 qershori-14 korrikun e këtij viti.

"Ky është grup ndryshe nga kualifikueset e Europianit. I vështirë, janë skuadra fizike. Sigurisht i vështirë, por ndryshe nga i Europiani. Është ndryshe, nuk dua të them më i lehtë apo i fortë. Ukraina është e fortë dhe e vështirë. Ky është grup ndryshe dhe i fortë, skuadra fizike për mënyrën se si përballojnë futbollin.

Vendi i parë? Sigurisht si objektiv po. Por më pas, sipas meje, grupi është shumë i ekuilibër dhe do të ketë ndeshje të vështira, duhet të luftojmë për çdo pikë në çdo ndeshje, që të marrim maksimumin.

Ndonjë grup tjetër? Tani që mbaroi shorti, nuk kam preferenca, mbaroi. Tani të mendojmë për Italinë", tha Sylvinho pas shortit.

Kuqezinjtë e Sylvinhos do përballen me Çekinë, Ukrainën dhe Gjeorgjinë në Grupin B1 të Ligës B.

Liga e Kombeve mësoi sot ndarjen në grupe, kjo pas shortit në Paris. Padyshim që Liga A është ajo me ndeshjet më të forta, aty ku Italia dhe Gjermania kanë rivalë të fortë.

Grupi A1 gjen përballë Kroacinë, Portugalinë, Poloninë dhe Skocinë. Në A2, Italia luan me Belgjikën, Francën dhe Izraelin. Edhe Grupi A3 gjen përballë Holandën, Hungarinë, Gjermaninë dhe Bosnjën. Në atë A4, Spanja gjen Danimarkën, Zvicrën dhe Serbinë.

Giorgios Karagunis, ish-kapiteni i Greqisë ka zgjedhur goglat e Ligës C në Ligën e Kombeve. Kosova u shortua në grupin C2 së bashku me Rumaninë, Qipron dhe një mes Lituanisë apo Gjibraltarit (play-off). Kujtojmë se Kosova edhe në kualifikueset e Euro 2024 ishte në short me Rumaninë, aty ku në Bukuresht huliganët vendas përdhosën simbolet e Kosovës.