Parlamenti egjiptian, i dominuar nga islamikët, miratoi sot një ligj që ua ndalon kandidimin në zgjedhjet presidenciale të majit të gjithë atyre që kanë pasur poste të larta në regjimin e Mubarakut. Ligji ka qartazi në shënjestër Omar Suleiman, ish-zv/president në ditët që paraprinë largimin e Mubarak, por edhe shefi i shërbimeve sekrete në vend për 18 vjet. Deklarimi i Suleiman se do të kandidonte për postin e presidentit shkaktoi reagime të ashpra te grupimi i partive islamike që e panë këtë lëvizje si një përpjekje e ushtarakëve për ta mbajtur ende pushtetin.
Mirëpo, ligji që synon eliminimin e Omar Suleiman nga gara duhet miratuar edhe nga këshilli ushtarak dhe ministri i drejtësisë është shprehur tashmë se ligji është jokushtetues. Mosmiratimi i ligjit nga ushtarakët mund të sjellë tensionim të situatës në prag të zgjedhjeve presidenciale. Vëllezërit Myslimanë kanë deklaruar tashmë kandidatin e tyre për president, biznesmenin Khairat el-Shater. Një lajm që nuk u prit aspak mirë nga partitë e opozitës liberale, që e akuzuan Vëllazërinë se pas fitores së zgjedhjeve parlamentare, synon tashmë të ketë kontroll të plotë të pushtetit në vend.
(ep/shqiptarja.com)