LSI: Jemi partnerë serioze 
mbrojmë interesat e qytetarëve

Teksa përgatitet për procesin zgjedhor të 18 qershorit, LSI jep mesazhe të vazhdueshme mbi qëndresën dhe vijueshmërinë e saj në koalicionin qeverisë.

Dje, teksa zhvilloi konventën zgjedhore për degën e njësisë administrative numër 7 në Bashkinë e Tiranës, përmes tre anëtarëve të kryesisë së saj, LSI u ripozicionua si një partnere serioze që në vijë të parë ka mbrojtjen e interesit të qytetarëve.

Kjo konventë u zhvillua në kuadër të zgjedhjeve të brendshme në strukturat e LSI-së për qarkun e Tiranës nga ku do të zgjidhet Kryetari i ri për degën e kryeqytetit si edhe Komiteti i ri Drejtues për degën e LSI Tiranë.

Të pranishëm në konventën e njësisë administrative numër 7 ishin dy nënkryetarët e LSI-së, Luan Rama dhe Kejdi Mehmetaj, si edhe Sekretari i Përgjithshëm i Lëvizjes Socialiste për Integrim, Endrit Braimllari.

Luan Rama theksoi se Lëvizja Socialiste për Integrim është forca politike e cila solidarizohet me qytetarët gjë e që dallon anë nga partitë e tjera. “LSI partnere serioze dhe e vendosur për interesat e qytetarëve. Lëvizja Socialiste për Integrim ka një vlerë që nuk e kanë forcat e tjera politike dhe që kjo është më e spikatur dhe që ka të bëj me solidaritetin. Ne jemi një forcë e solidaritetit. Ne jemi forcë politike që ju gjendemi dhe jemi pranë njerëzve. Sfida jonë e vetme janë hallet,  shqetësimet dhe interesat e qytetarëve. Me siguri e kemi dëgjuar fjalimin që mbajti Presidenti i ri SHBA-ve dhe ajo që çfarë bënte përshtypje ishte solidariteti. Ne kemi vlerë dhe duhet të demonstrojmë të gjithë fuqinë tonë në solidaritetin, në humanizmin dhe në bashkëveprimin me të gjithë qytetarët. Të parët janë qytetarët dhe LSI-ja është forca për t’i shërbyer qytetarëve”,- tha Rama.

Sekretari i Përgjithshëm i LSI-së, Endrit Braimllari nënvizoi faktin se LSI është një forcë politike e cila qëndron pranë qytetarëve dhe të gjithë procesin e riorganizimit e bëri duke zbatuar parimet e kolegjialitetit dhe meritokracisë. “Por edhe ky proces tregoi kolegjialitetin e plotë që ekziston brenda LSI-së. Forca e LSI qëndron tek njerëzit thjeshtë, qëndron tek solidariteti, tek bashkëpunimi, tek fryma e ekipit dhe tek dëshira maksimale për t’i shërbyer çdo qytetari. LSI do të ketë një rrugëtim shumë të fortë dhe shumë të suksesshëm sepse LSI ka dy parime kryesore, që është vëmendja kryesore tek organizata e partisë, tek baza, tek anëtarët që punojnë çdo ditë, dhe tek meritokracia”,- tha Sekretari i Përgjithshëm i LSI-së.

Nënkryetarja e Lëvizjes Socialiste për Integrim, Kejdi Mehmetaj në fjalën e saj ndaloi tek vija politike të LSI-së e cila është në drejtimin e duhur dhe për këtë, rezultatet e zgjedhjeve të 18 qershorit do të jenë të jashtëzakonshme për LSI-në.

“Kur kemi vijën politike në drejtimin e duhur, jam e bindur se rezultate e datës 18 qershor do të jenë të jashtëzakonshme. Siç e kemi thënë, pritshmërinë tona janë shumë të mëdha dhe për këto pritshmëri puna nuk duhet të ndalojë për asnjë moment. Ndaj me një organizim të tillë, me këtë komitet drejtues, me gjithë të zgjedhurit e organizatave dhe me drejtuesit e rinj të njësisë këtu, besoj se puna do të jetë jashtëzakonisht shumë e mirë”,- u shpreh nënkryetarja e LSI-së, Mehmetaj.

Redaksia Online
XH.K/Shqiptarja.com