Sot bëhen 10 vjet nga shpërthimi i Gërdecit ku humbën jetën 26 persona e u plagosën dhjetëra të tjerë. Kryetari i grupit parlamentar socialist, Taulant Balla ka qenë i pari që ka përkujtuar 26 viktimat e kësaj tragjedie, gjatë fjalës së tij në Kuvend. 

Nga foltorja, Balla evidentoi mungesën e ish-kryeministrit Sali Berisha në Kuvend, i cili sipas tij është përgjegjës për tragjedinë e rëndë ku një fshat i tërë u hodh në erë. Balla tha se Berisha nuk është lejuar nga Basha të shkojë në Kuvend, pikërisht se seanca përkon me 10 vjetorin e Gërdecit. 

“Një përkujtim në memorie të 26 të vrarëve në Gërdec, bëhen 10 vite nga dita që shteti hidhte në erë një fshat të tërë, e ku përgjegjësia penale e atij krimi e tragjedie të rëndë nuk është bërë. 

Ju që ikni ng salla sa herë që në sallë thuhen të vërteta. Tavarish Luli, ke bërë mirë që nuk e ke lejuar Saliun të vinte në sallë e nuk ia ke vënë emrin në listë për të folur se në 10 vjetorin e Gërdecit, se do ishte një tjetër provokim i rëndë për pamundësinë që drejtësia të kishte bërë detyrën. 

Tragjedia dhe krimi i Gërdecit duhet hetuar deri në fund për të gjithë fajtorët, për 26 jetët e humbura e pronat e shkatërruara. Duhet të vihet aty ku i takon dhe fajtorët të shkojnë aty ku u takon”, u shpreh Balla. 

Redaksia Online
l.q/Shqiptarja.com