‘Tahiri’, Rama: Barbari që ngjan
me burgosjen e Nanos në vitet ‘90

Teksa ka folur me tone të ashpra ndaj Prokurorisë së Krimeve të Rënda mbi kërkesën e kësaj të fundit për arrestimin e Saimir Tahirit, kryeministri Edi Rama është rikthyer pas në kohë, duke sjellë në vëmendje ngjarjen e viteve ’90, kur u arrestua lideri histori i PS, Fatos Nano.

Rama tha se kjo barbari ndaj Tahirit ngjan si ajo që ndodhi ndaj Nanos në fillim të viteve ’90, kur drejtësia e çoi pas hekurave me ca letra magazine nga Italia, me demek për të bërë drejtësi.

“Ai që akuzon duhet të vërtetojë çdo akuzë që ngre. Akuzuesi nuk jep asnjë provë. Kjo barbari a nuk u ngjan me atë që ndodhi në fillim të viteve ’90 që drejtësia çoi pas hekurave kryetarin e partisë tonë. Me ca letra magazine nga Italia, por me demek për të bërë drejtësi. Kush e inskenoi pas 25 vitesh atë stafetë barbarie, mes politikës së baltos dhe drejtësisë së burgos. Shqiptarët presin zbatimin e Vettingut, që e udhëhoqëm ne. Kur Shqipëria pret të çelë negociatat të arrestohet një deputet pa e marrë në pyetje dhe pa prova të faktuara. Ku u gjet ky zell i një prokurorie të rënda që nuk ka lëvizur gishtin që kur është ngritur”, tha Rama.