“Kam shumë besim se në vitin 2016, në pranverë 2016, Shqipëria do të ketë një reformë të thellë të gjyqësorit. Përse kam kaq shumë besim? Së pari, është mjaft e qartë se populli shqiptar e kërkon këtë reformë. Së dyti, Komisioni i Venecias ka folur qartë dhe me zë të lartë. Ata kanë thënë se kjo reformë është thelbësore për Shqipërinë dhe është e ngutshme. Bashkimi Evropian ka thënë se kjo reformë do t’i hapë dyert, dëshirës së Shqipërisë për bisedimet e anëtarësimit. Së fundi, kjo reformë ka mbështetjen e plotë dhe entuziaste të partnerit strategjik të Shqipërisë, Shteteve të Bashkuara të Amerikës.,” tha Lu ndërsa shtoi se pas ekspertëve është radha e politikës që të gjejë një formulë të përbashkët.
Lu po ashtu i bëri thirrje qytetarëve shqiptarë që ta mbështesin këtë reformë, pasi sipas tij ky do të jetë hapi më i madh përpara në këto 25 vite. Ambasadori amerikan po ashtu foli edhe për marrëdhëniet e Shqipërisë me SHBA-në të cilat i cilësoi si të shkëlqyera, duke renditur edhe 3 prioritetet e amerikanëve për Shqipërinë.
“Unë kam punuar në shërbimin diplomatik për 25 vite, por kurrë në një vend me të cilin SHBA ka marrëdhënie kaq të ngushta. Kemi 3 përparësi. Të mbështesim zhvillimin e reformave, të ndihmojmë Shqipërinë që të bëhet aleat më i fortë në NATO dhe të mbështesim zhvillimin e institucioneve demokratike,"
Por përveç tyre, Lu renditi për këtë vit edhe 3 përparësi të tjera, ku pas reformës në drejtësi, prioritet mbetet krijimi i Byrosë Kombëtare të Hetimit bazuar në modelin e FBI-së amerikane.
“Veç reformës në drejtësi, këtë vit kemi në plan edhe tri përparësi të tjera: të vazhdojmë të punojmë drejt realizimit të nismës për krijimin dhe trajnimin e një Byroje Kombëtare Hetimi, bazuar në FBI-në amerikane, përmes së cilës shqiptarët do të hetojnë rastet e korrupsionit. Së dyti, ne po bashkëpunojmë shumë afër me Ministrinë e Mbrojtjes dhe vendet e tjera të NATO-s, për të modernizuar format e armatosura të Shqipërisë, kryesisht disa njësi të rëndësishme të ushtrisë, që të shërbejnë krahas forcave të NATO-s kudo në botë. Dhe së fundmi ne jemi shumë të angazhuar për zhvillimin e sektorit të organizatave jo-qeveritare në Shqipëri dhe të shtypit të pavarur, që të shërbejnë si vëzhguese të abuzimeve nga qeveria ose opozita. ” shtoi ambasadori amerikan.
Sa i përket lidhjes së politikës me krimin, Lu tha se ekzistojnë disa lidhje serioze çka sjell domosdoshmërinë për ndarjen e këtyre dy botëve përmes procesit të dekriminalizimit.