Një sulm me raketa ruse ndodhi gjatë natës në rajonin verior të Ukrainës Sumy, ku të paktën një person u vra dhe katër u plagosën, thotë administrata e rajonit, cituar nga Ukrinform.

Sulmi, mësohet se ka goditur disa kamionë të përdorur për transportin e grurit dhe disa automjete janë dëmtuar.

Kampioni ukrainas i botës në kikboks vritet në front.

Ndërkohë ditën e sotme janë gjetur mbetjet e një helikopteri rus i zhdukur një ditë më parë. Në bord ndodheshin 22 persona.Ndërkohë autoritetet ruse bëjnë me dije se ekipet e kërkim shpëtimit kanë gjetur 17 trupa. 

Rendit zhvillimet sipas orarit:
Ora 20:58
Pamje/ Momenti kur raketa ruse bie në Kharkiv dhe rrafshon qendrën tregtare! 28 të plagosur nga bombardimet e Moskës, mes tyre dhe ekipi i mjekëve

 

Pamje para dhe pas shpërthimit

Raketat ruse goditën Kharkivin me rreth dhjetë sulme raketash njëra pas tjetrës, duke plagosur 28 persona, përfshirë edhe ekipin e mjekëve, që nxituan për të ndihmuar.

Infrastruktura e dëmtuar ishin një qendër tregtare, një objekt sportiv dhe ndërtesa banimi.

Në videon më sipër është momenti i saktë në të cilin kamerat e sigurisë regjistrojnë raketën që hyn në një ndërtesë tregtare dhe e hedh në erë, duke rrafshuar gjithçka përreth saj, shkruan "La Repubblica".

Ditët e fundit lufta mes Ukrainës dhe Rusisë është përshkallëzuar, teksa Moska ka hapur disa fronte, duke synuar edhe termocentralet bërthamore, si hakmarrje e pushtimit të Kurskut nga Ukraina.

Negociatat nuk po japin rezultat, teksa orët e fundit është diskutuar edhe për një tërheqje të mundshme të Kievit nga disa territore të pushtuara së fundmi.

A.Q/Shqiptarja.com

Ora 14:49
U zhduk një ditë më parë, gjenden mbetjet e helikopterit rus Mi-8, 17 trupa të gjetur

Foto: Mbetjet e helikopterit Vityaz-Aero Mi-8

Një helikopter Vityaz-Aero Mi-8 u rrëzua në tokë menjëherë pas ngritjes në rajonin Kamçatka të Rusisë. Në bord ndodheshin 22 persona. Mes tyre ishte edhe drejtori financiar i Federatës Ruse të Futbollit, Arseny Zamyatin dhe bashkëshortja e tij.

Autoritetet bëjnë me dije se deri më tani janë gjetur 17 trupa, ndërkohë që vazhdojnë kërkimet për viktimat e tjera.

Helikopteri Mi-8 u ngrit të shtunën pranë vullkanit Vachkazhets, por nuk arriti në destinacionin e tij siç pritej, shkruan La Repubblica.

Mi-8 është një helikopter me dy motorë i projektuar në vitet 1960.

Xh.K/Shqiptarja.com

Ora 10:23
Moskë: 158 dronë të Kievit u rrëzuan në 15 rajone ruse

Foto: Një ndërtesë e dëmtuar në Rusi

Sistemet ruse të mbrojtjes ajrore rrëzuan mbrëmë 158 dronë ukrainas në 15 rajone ruse. Lajmi është bërë i ditur nga Ministria e Mbrojtjes e Moskës.

“Sistemet e mbrojtjes ajrore në shërbim shkatërruan dhe kapën 158 dronë ukrainas”, thuhet në një deklaratë.

Nga armët e përgjuara, 46 ishin në rajonin e Kurskut, 34 në rajonin Bryansk, 28 në rajonin e Voronezh dhe 14 në rajonin e Belgorodit.

Nëntë dronë u rrëzuan në rajonin e Moskës në orët e para të ditës së sotme. Për më tepër, gjatë natës, tetë dronë ukrainas u rrëzuan në rajonin Ryazan, pesë në rajonin Kaluga, katër në rajonin Lipetsk, tre në rajonin Tula, dy në rajonet Tambov dhe Smolensk dhe një në rajonet Oryol, Tver dhe Ivanovo.

Xh.K/Shqiptarja.com