Ukraina ka akuzuar Rusinë për shkelje të armëpushimit të shpallur nga Kievi duke filluar nga mesnata e 6-të majit.

 "Sulmet ruse, duke lëshuar 108 dronë dhe tre raketa, vazhduan gjatë gjithë natës, përfshirë bombardimin gjatë mëngjesit në Kharkiv dhe Zaporizhzhia," shkroi Ministri i Jashtëm Andrii Sybiha në X.

Ai shtoi se Moska ka injoruar edhe një herë një apel realist dhe të drejtë për t'i dhënë fund armiqësive, të mbështetur nga shtete të tjera dhe organizata ndërkombëtare.

“Kjo tregon se Rusia refuzon paqen dhe se thirrjet e saj të rreme për një armëpushim më 9 maj nuk kanë të bëjnë fare me diplomacinë. Putini është i interesuar vetëm për paradat ushtarake, jo për jetët njerëzore", shtoi ai.

Presidenti ukrainas Volodymyr Zelensky paralajmëroi se Kievi do të përgjigjej "në mënyrë simetrike" ndaj çdo shkeljeje të armëpushimit, ndërsa vetë Rusia bëri thirrje për një armëpushim për festimet e Ditës së Fitores më 9 maj, dita kur ushtria sovietike fitoi ndaj ushtrisë naziste në Luftën e Dytë Botërore.

Lufta në Ukrainë është tani në vitin e saj të katërt dhe ka pasur disa raunde bisedimesh për paqe, me SHBA-në që vepron si ndërmjetës. Megjithatë, procesi është bllokuar që kur Presidenti i SHBA-së, Donald Trump, e zhvendosi fokusin e tij te lufta në Lindjen e Mesme.