SHKUP -  Më shumë se 66 për qind e maqedonasve vlerësojnë se Serbia është vendi më miqësor përkundrejt Maqedonisë, ndërsa mbi 66 për qind mendojnë se Shqipëria nuk është vend miqësor me Maqedoninë.
 
Ky rezultat del nga një anketë, realizuar nga Instituti për hulumtimin e opinionit publik “Dimitrije Çupovski” nga data 17 – 21 maj, ku janë anketuar 1050 anketues, ndërsa hulumtimi kishte për bazë të analizojë perceptimet dhe qasjet e qytetarëve ndaj vendeve fqinje si dhe marrëdhëniet ndërfqinjësore, transmeton agjencia e lajmeve INA.
 
Sipas anketës, 66 për qind e maqedonasve vlerësojnë se Shqipëria është një vend me qasje armiqësore ndaj Maqedonisë, ndërsa 79,8 për qind e shqiptarëve në Maqedoni kanë theksuar të kundërtën.
 
Serbia qëndron si vendi më miqësor dhe më i afërt për maqedonasit, për sa i përket qasjes dhe fqinjësisë së mirë. Në pyetjen për Serbinë, se sa ky vend ka qasje miqësore ndaj Maqedonisë, mbi 66 për qind e maqedonasve kanë dhënë përgjigje pozitive, 28 për qind përgjigje negative. Ndërsa shqiptarët e pyetur në lidhje me këtë pyetje, 56 për qind mendojnë se Serbia ka qasje jomiqësore ndaj Maqedonisë, ndërsa 26 për qind kanë theksuar se Serbia ka qasje miqësore ndaj Maqedonisë.
 
Sa i përket Bullgarisë, 23,5 për qind e maqedonasve mendojnë se ky vend ka qasje miqësore dhe partneriteti me Maqedoninë, ndërsa mbi 36 për qind e shqiptarëve janë shprehur pozitivisht lidhur me Bullgarinë si vend mik. Ndërsa rreth 64 për qind e maqedonasve kanë theksuar se Bullgaria ka qasje armiqësore ndaj Maqedonisë.
 
Lidhur me raportet me Greqinë, 86 për qind e të anketuarve maqedonas kanë theksuar se ky vend ka qasje armiqësore dhe jomiqësore ndaj Maqedonisë, ndërsa shqiptarët janë shprehur 72 për qind rreth kësaj pyetje për një “Greqi armiqësore”. Vetëm një pakicë e të dyja komuniteteve, prej 6 dhe 9 për qind kanë vlerësuar se Greqia ka qasje miqësore ndaj Shkupit.
 
Në pyetjen se cilët nga këto vende kanë qëllime të mira ndaj Maqedonisë, në tërësi 60 për qind janë shprehur vetëm pro Serbisë, 0,5 për qind për Shqipërinë, 4,5 për qind për Bullgarinë, 0,5 për Kosovën, 0,6 për qind për Greqinë, etj.
 
Redaksia Online
(mag/shqiptarja.com)