Në lidhje me artikullin e sotëm të gazetës Shqiptarja.com, Ministria e Punëve të Jashtme bën sqarimin e mëposhtëm për sa i përket çështjes së kompetencës së Presidentit të Republikës në lëshimin e plotfuqive për nënshkrimin e marrëveshjeve ndërkombëtare:

Në hartimin e projektligjit të ri “Për marrëveshjet ndërkombëtare në Republikën e Shqipërisë” Ministria e Punëve të Jashtme i është përmbajtur në mënyrë rigoroze dispozitave të Kushtetutës në lidhje me kompetencat e Presidentit të Republikës për sa i përket marrëveshjeve ndërkombëtare, dispozitave të Konventës së Vjenës mbi të Drejtën e Traktateve, 1969, ku Republika e Shqipërisë është palë, si dhe praktikës përkatëse ndërkombëtare.

Projektligji i ri në asnjë moment nuk prek kompetencën e Presidentit të Republikës për të autorizuar lëshimin e plotfuqisë për negocimin dhe nënshkrimin e marrëveshjeve ndërkombëtare që lidhen në emër të Republikës së Shqipërisë. Ashtu si Presidenti i Republikës, dhe Kryeministri autorizon lëshimin e plotfuqive për nënshkrimin e marrëveshjeve ndërkombëtare që lidhen në emër të qeverisë shqiptare.

Në të dy rastet e lartpërmendura, projektligji parashikon se vetëm pas marrjes së autorizimeve përkatëse nga Presidenti ose Kryeministri, Ministri i Punëve të Jashtme mund të përgatisë dhe lëshojë plotfuqinë për nënshkrimin e marrëveshjeve ndërkombëtare.

Ky projektligj garanton që asnjë marrëveshje ndërkombëtare që do të lidhet në emër të shtetit shqiptar nuk mund të negociohet apo nënshkruhet pa autorizimin përkatës të Presidentit të Republikës.

Redaksia online
(u.s/shqiptarja.com)