Marrëveshja detare me Greqinë
Panariti:Ka interes, por jo bisedime

TIRANE - Shqipëria është e interesuar për një marrëveshje të re me Greqinë për detin, që të jetë e pranueshme nga të dyja palët, por ende nuk ka asnjë bisedim mes dy vendeve. Konfirmimi ka ardhur gjatë ditës së sotme nga ministri i Jashtëm shqiptar, Edmond Panariti, gjatë një konference të përbashkët për shtyp që zhvilloi në Tiranë pas takimit me homologun kosovar, Enver Hoxhaj.

“Nuk mund të ketë absolutisht ndonjë fillim të aktiviteti ekonomik në një zonë në të cilën nuk është arritur dhe nuk ka asnjë marrëveshje të ekskluziviteti ekonomik. Ju e dini që vendimi i Gjykatës Kushtetuese të Shqipërisë e anulon marrëveshjen e mëparshme dhe në këto momente që flasim mes Shqipërisë dhe Greqisë nuk ekziston asnjë marrëveshje për kufirin detar apo ekonomike. Ne padyshim që jemi të interesuar për arritjen e një marrëveshjeje të tillë, por kërkohet kohë, kërkohet që gjithçka te zhvillohet në përputhje me legjislacionin ndërkombëtar dhe të ligjit të vendit dhe ajo që është më kryesorja, është që marrëveshja e re duhet të jetë e pranueshme nga të dyja palët në mënyrë që të jetë afatgjate dhe e pranueshme.”, -u shpreh kryediplomati shqiptar.

Ministri foli edhe për pozicionin refuzues të Holandës mbi dhënien e statusit të vendit kandidat Shqipërisë. Shefi i diplomacisë shqiptare sqaroi se ky pozicion nuk është ende zyrtar dhe se ka ende kohë për të lobuar.

"Ky nuk është ende qëndrimi zyrtar, sepse për të marrë një qëndrim final ka edhe dy muaj kohë. Deri atëherë Shqipëria duhet të miratojë dy ligje dhe një rregullore me 3/5. Mendoj se topi është në fushën tonë, por politika shqiptare duhet të bëjë detyrat e shtëpisë.", tha Panariti.

Ministri Panariti iu përgjigj gjithashtu edhe deklaratës së homologut të tij grek, i cili është shprehur se në Ballkan po rritet shovinizmi. Panariti tha se ministri grek me siguri po fliste edhe për vendin e tij e jo vetëm për fqinjët.

(im/Gre.M/Shqiptarja.com)