Masakra në Mat, ministrja Xhaçka në familjet e të vrarëve: Autori do të marrë dënim maksimal

Ministrja e Mbrojtjes, Olta Xhaçka ka vizituar ditën e sotme, familjet e të vrarëve në Shëlli. Xhaçka është zotuar para tyre se autori i kësaj masakre do të marrë dënimin maksimal.

Xhaçka ka thënë se do të jetë sistemi i drejtësisë ai që do të japë vendimin për autorin e vrasjes së punonjësve në Mat.

Dy ditë më parë, Mati u trondit nga një masakër e rëndë. Kujtim Koxha ka vrarë 3 persona dhe një tjetër e ka plagosur rëndë. 2 nga viktimat ishin punonjës të bashkisë Mat, ndërsa një tjetër ishte banor i zonës. Shkak për ngjarjen ka qenë ndërtimi i një rruge në fshat. Punonjësit e bashkisë janë ulur për të drekuar në lokalin e fshatit. Gjatë kohës kur ata po drekonin brenda lokalit të fshatit, ata janë qëlluar me automatik nga 51-vjeçari Kujtim Koxha. Policia njofton se Koxha iu ka kërkuar punonjësve të bashkisë që të ndërtonin edhe rrugën që kalon para shtëpisë së tij. Në momentin kur ai iu ka kërkuar punonjësve të bashkisë që të ndërtohet rruga para shtëpisë së tij, ai ishte i dehur. Erzen Aliaj, një nga punonjësit e bashkisë, e ka qëlluar atë më shuplakë. Kjo ka qenë zanafilla e konfliktit. Pas këtij sherri, ai ka shkuar në banesë dhe ka marrë armën e tij automatik dhe më pas ka shkuar në lokal sërish dhe ka qëlluar mbi 2 punonjësit e bashkisë dhe 2 banorë të zonës.

TAG:
• olta xhaçka
• masakra ne mat