Mazhoranca do hetojë SHISH e
Visho Ajazit, PD:E paprecedentë

TIRANE- Mazhoranca zyrtarizon kërkesën për hetimin e veprimtarisë së SHISH të drejtuar nga Visho Ajazi. 

Deputeti socialist Piro Lutaj  ka dorëzuar sot, në rrugë zyrtare në Kryesinë e Kuvendit, kërkesën e tij me shkrim për të kontrolluar nga afër ligjshmërinë e veprimeve të Shërbimit Informativ Shtetëror, si dhe udhëzimin për përgjimin e punonjësve të Policisë së Shtetit.

Kërkesa vjen pak ditë pasi propozoi në komisionin parlamentar të sigurisë që të bëhet kontroll nga afër për ligjshmërinë e veprimeve të Shërbimit Informativ Shtetëror.

Në këtë shkresë zyrtare propozohet ngritja e një komisioni të përbëre nga 5 anëtarë, 3 nga mazhoranca dhe 2 nga opozita. 

"Duke qenë se në mbledhjen e Komisionit të sigurisë nuk morën përgjigje për shkak të mospasjes së çertifikatës së sigurisë nga kreu i SHISH për t’u njohur me dokumentacionin sekret, është e nevojshme kryerja e kontrollit në ambientet e këtij shërbimi. "- argumentohet në kërkesë.


(Foto: Kreu i SHISH dhe kërkesa e Piro Lutaj për hetim)

Gjithashtu kërkohet të verifikohet ligjshmëria e dokumentit dërguar drejtorive të SHISH, si dhe për veprimtaritë antiligjore të emërimeve, përgjimeve dhe mungesës së dhenies së infiormacionit Ministrisë së Brendshme për aktet terroriste.

Pas dorëzimit të kërkesës ka reaguar nënkryetari i Komisionit të Sigurisë Flamur Noka. Sipas Nokës “kërkesa e paraqitur nga mazhoranca është tërësisht e pabazuar në ligj”.

Ndërsa shton se është “Akt i paprecedent, dhe përpjekje për të vendosur në kontroll SHISH. Akti cenon dhe trondit sigurinë kombëtare”.
 
Pas deklaratës së Nokës, ka reaguar edhe deputeti Lutaj, i cili për "A1 Report" u shpreh:  “Noka mos ngatërrojë çështjen e minierave me sigurinë”.

Mbledhjen e Komisionit të Sigurisë, të datës 11 mars 2014, deputetët e mazhorancës dhe të opozitës u përfshinë në debate përsa i përket certifikatës së sigurisë, që duhej të kishte kreu i SHISH, Visho Ajazi Lika, si edhe deputetët e këtij komisioni të Kuvendit. Gjatë debateve, deputeti Lutaj paraqiti para komisionit nismën e tij për të kontrolluar veprimtarinë e SHISH me argumentin se, nëse kreu i këtij Shërbimi nuk raporton në Kuvend, atëherë deputetët do të ikin vetë për ta bërë këtë gjë tek institucioni i inteligjencës shqiptare. Spatak Braho theksoi se "ky kontroll nuk ka pse të sjellë hezitimin e deputetëve të opozitës".

Redaksia Online
(e.s/shqiptarja.com)

TAG:
• visho ajazi lika