Baldushku, vendi tradicional për gjelin e detit gjallërohet nga kërkesa e lartë për shpendin simbolik të tryezave festive. Banorët e Baldushkut thonë që çmimi varion nga 1000 lekë për qelin e detit dhe 1200 lekë për pulën.

“Kilen e shesim 10 mijë lekë, dhe 12 mijë lekë. Ka kërkesa. Mishi është i mirë. Pulat janë rrit me ushqim bio”, shprehet një banor.

Për të shitur në fundvit, atyre iu duhet të investojnë 8 muaj më parë. Banorët tregojnë për Report TV, se pula dhe gjelat e detit i blejnë zogj dhe kujdesen për to, muaj me radhë. Çmimi me të cilin i shesin nuk i ‘kënaq’.

“Gjeli i detit është 10.000 lekë (vjetra) kilja. Më tepër nuk shkon më”, thotë një tjetër.

“Nuk ka ndonjë fitim të madh”, thotë qytetari.

Edhe pse interesi është i lartë nga qytetarët, thonë ata, shqetësim mbetet konkurrenca e pandershme që iu vjen nga importi, prej nga ku ky produkt vjen më i lirë.

“Ka pasur interes. Ka më tepër për pulën e detit sa gjeli se janë njerëzit janë të ndarë tani, janë pak në shtëpi, gjeli përshembull shkon 9 kg-10 kg, kurse pula vjen 5 kg. I marrin me 7.000 lekë edhe i shesim me 9.000 mbasandaj, na vënë neve në siklet që kam shtatë muaj tetë muaj që i mbaj këta”, tregon një tjetër banor i Baldushkut.

Problemi i importit është ngritur si shqetësim edhe më i ndjeshëm nga fermerët e Cakranit në Fier, të cilëve gjelat dhe pulat e detit u kanë mbetur pa shitur për shkak se tregu po dominohet nga produktet e importuara, kryesisht nga Greqia.