Mcllwham:Presidenti,konsensus
nga politika e populli

BERAT- Nga qyteti i Beratit ambasadorja Britanike Fiona Mcllwham i bashkohet apelit të ndërkombëtarëve se presidenti i ri duhet të gëzojë e të marrë miratimin e të gjithë klasës politike dhe të popullit.

“Nuk është komuniteti ndërkombëtar që duhet të diktojë se si duhet të zgjidhet dhe cili do të jetë Presidenti. Është Kushtetuta e cila përcakton shume qartë. Ai duhet të gëzojë dhe të marrë miratimin e të gjithë klasës politike dhe të gjithë popullit” deklaroi ambasadorja britanike e cila sot paradite ndodhet për vizitë në qytetin e njëmbinjë dritareve.

Duke u ndalur në procesin e integrimit të Shqipërisë në BE, ambasadorja vuri theksin në forcimin e shtetit të së drejtës dhe përmbushjen e standardeve që kërkon Bashkimi Europian.
“I takon Shqipërisë dhe klases politike të arrijë të përmbushë strandardet dhe objektivat për në BE. Shteti i së drejtës duhet të forcohet. Problemi i korrupsionit është fenomen që kërkon përfshirjen e të gjithë aktorëve për tu trajtuar dhe luftuar” nënvizoi më tej Mcllwham, duke vlerësuar se ka pasur progres në reformën elektrorale, parlamentare dhe në drejtësi.

Gjatë qëndrimit në Berat ambasadorja britanike zhvilloi takim me kryetarin e bashkisë, zotin Fadil Nasufi dhe do të takohet dhe me prefektin e qarkut.
 (sg/shqiptarja.com)