Protestues pro Palestinës u mblodhën në sheshin Skënderbej, ku kërkuan ndalimin e luftës në Gaza. Ata tentuan të zhvillonin një marshim, por u ndaluan nga policia.

***

Tiranë - Thirrjet “Liri, liri!” u dëgjuan në Sheshin Skënderbej ku mbështetës të Palestinës protestuan kundër luftës në Gaza.  

Me flamuj palestinezë e pankarta në duar, ata dënuan vrasjen e mijëra fëmijëve të pafajshëm dhe kërkuan ndalimin e asaj që po ndodh në Gaza.

Nuk munguan as përplasjet me oficerët. Kryetari i shoqatës ‘Mexhlis’, Floriar Arapi, akuzoi policinë se nuk i lejoi të zhvillonin marshimin e planifikuar.

“Policia ka lejuar protestën te sheshi, por nuk na kanë lejuar që në të zhvillojmë marshimin”, tha ai. 

Megjithatë, protestuesit tentuan të realizonin marshimin, duke u nisur drejt Rrugës së Kavajës. Por aty u ndaluan nga kordonët e policisë që kishin bllokuar daljen nga sheshi.

Demonstruesit provuan një tjetër dalje, por edhe aty u përballën me policinë.

Pas rreth një ore e gjysmë tension dhe përplasje verbale, protestuesit u larguan.