Regjistrohen 12 viktima në Itali! Më shumë se 12 milionë raste Covid në botë… SHBA tejkalon pragun e 3 milionë infeksioneve

Sipas të dhënave nga Ministria e Shëndetësisë Italiane, gjatë 24 orëve të fundit në vend janë regjistruar 12 viktima nga koronavirusi, për një total prej 34926 që nga fillimi i emergjencës shëndetësore.

Sot numri i të shëruarve në Itali ishte 338 ndërsa numri i përgjithshëm i tyre ka shkuar në 193 978

Autoritetet e shëndetësisë raportuan gjithashtu se sot u regjistruan edhe 229 raste të reja pozitiv për një total prej 242.363

Aktualisht pozitivët në Itali janë 13 459, 136 më pak se dje.

Në Rajonin e Lombardisë sot u regjistruan 5 viktima nga koronavirusi dhe 119 raste të reja të pozitivitetit Covid.

Gjithashtu nga rajoni u raportuan edhe 217 pacientë të shëruar

Tokio konfirmoi sot 224 raste Covid-19, një rekord i infeksioneve të identifikuara brenda një dite të vetme, duke arritur në 200 raste për herë të parë që nga 17 prilli kur u regjistruan 206 pozitivë me koronavirus.

Rastet e konfirmuara çdo ditë për kryeqytetin janë rritur sidomos gjatë javës së fundit, por qeveria e Tokios tha se kjo ishte kryesisht për shkak të faktit se më shumë njerëz iu nënshtruan testeve të tamponit, veçanërisht ata që punojnë në lokalet e natës (argëtimit), baret e restorantet. Po sipas autoriteteve, rreth 70% e të infektuarve të rinj janë të moshës 20 dhe 30 vjeç.

Në total, numri i personave të infektuar nga Covid-19 në kryeqytetin japonez tani është 7272, ndërsa në nivelin kombëtar ka më shumë se njëzet mijë dhe numri i vdekjeve është 980.

Numri i të vdekurve nga COVID-19 në Francë ka shkuar në 29.965

Në 24 orët e fundit, në Francë janë regjistruar 663 të infektuar, me çka numri i përgjithshëm i rasteve është rritur në 204.625, njoftoi Instituti i Shëndetit Publik.

Aktualisht, 7.297 persona po trajtohen në spitale, prej të cilëve 529 gjenden në kujdes intensiv.

Numri i pacientëve në njësitë e kujdesit intensiv ka vazhduar të bie për të 91-tën ditë radhazi.

Numri i të shëruarve në Francë ka shkuar në 77.996, me 331 të shëruar në 24 orët e fundit.

Në 24 orët e kaluara, në vend janë regjistruar 32 vdekje.

Ende nuk ka asnjë shenjë të zbritjes së kurbës së koronavirusit në Brazil, ku Presidenti i Republikës, Jair Bolsonaro, gjithashtu u infektua kohët e fundit.

Gjigandi i Amerikës së Jugut ka regjistruar 1223 vdekje dhe 44.571 infeksione në 24 orët e fundit.

Numri i përgjithshëm i rasteve të konfirmuara të Covid-19 në vend është rritur në 1.713.160, ndërsa numri i përgjithshëm i viktimave që nga fillimi i pandemisë ka arritur në 67.694.