'Më tha Anisa është mirë, s'ka mundësi të flasë'/ Dëshmia e vëllait të Zhaneta Josifit, biseda e fundit me motrën

Vëllai i Zhaneta Josifit ka shkuar në polici më 2 korrik 2020 pasi prej disa ditësh nuk ka mundur që të komunikonte me motrën e tij dhe vajzat e saj. Madje me vajzën e vogël, Anisa Josifin rrëfen se kishte më shumë se dy vite që nuk e kishte takuar dhe nuk kishte pasur mundësi kontakti.

"Prej disa kohësh motra dhe vajzat ishin filluar të praktikonin besimin fetar. Gati 2 vite që nuk komunikoj me vajzën e vogël Anisën dhe sa herë që pyesja motrën, më thoshte se nuk gjendej në shtëpi", mësohet të ketë thënë vëllai i Zhaneta Josifit, S.F. Ai kishte shkuar edhe më herët në shtëpinë e motrës, ku i kishte kërkuar Zhanetës që të fliste me Anisën, por përgjigja e saj kishte qenë "Anisa është në moshë madhore dhe nuk ka pasur mundësi të flasë me njerëzit, por është shumë mirë dhe nuk ka probleme".

Pas këtij denoncimi në polici, Report Tv mëson se efektivët e komisariatit numër 6 kanë shkuar në banesën e familjes Josifi, kanë trokitur disa herë tek dera, por nuk ka pasur reagime. Për këtë arsye është njoftuar shërbimi zjarrfikës për të bërë hyrjen në banesë. Kur është hapur dera e shtëpisë, janë konstatuar dy viktima Zhaneta Josifi dhe vajza Anisa, teksa Blerta Josifi është gjetur në gjendje të rëndë shëndetësore.

Zhaneta Josifi e pajetë ka qenë e ulur në gjunjë afër divanit të sallonit ndërsa në dhomën e gjumit mbi një krevat dopio është gjetur trupi i pajetë i Anisa Josifit e dekompozuar, e mbuluar me copa të ndryshme dhe me jorgan. Në banesë, thonë burime nga policia, janë gjetur libra të ndryshëm fetar dhe shënime të ndryshme të shkëputura në disa fletore, për të cilat më vonë u mësua se i përkisnin Kishës Ungjillore.

Lajmi kryesor:

Vetëflijimi i nënë e bijë/ Dëshmia e vajzës: Motra u pushtua nga 'demonët'! Kisha Ungjillore: Familja anëtare e jona para 15 vitesh, s'predikojmë vetëvrasjen

B.K./Shqiptarja.com

TAG:
• Tirane
• Zhaneta Josifi
• Anisa Josifi
• Blerta Josifi
• veteflijohen nene e bije