Media britanike i kërkon qeverisë
 linjë të ashpër kundër Rusisë

Media e shkruar britanike, pa përjashtuar asnjë orientim politik të saj, përfshirë ”Times”, ”Guardian” dhe ”Daily Telegraph”, kërkojnë unanimisht nga qeveria e kryeministrit David Cameron një përgjigje më të ashpër kundër Rusisë pas publikimit të një raporti përfundimtar mbi vrasjen e agjentit rus, i shndërruar më pas në informator të britanikëve, Aleksander Litvinenko, ”ndoshta” i urdhëruar nga presidenti rus, Vladimir Putin.

Edhe pse jo të gjitha gazetat ia kushtojnë faqen e parë këtij lajmi, në editorialet e tyre propozohen një sërë masash përsa i takon Kremlinit, përfshirë sanksione të reja për individët apo dëbim i të gjithë diplomatëve rusë të identifikuar si agjentë të shërbimeve sekrete.

“Moska duhet të paguajë një çmim”, thonë ”Guardian” dhe ”Times” për atë që përcaktohet si “akt terrorist bërthamor i sponsorizuar nga një shtet”, pasi në vrasjen e ish-agjentit të KGB-së ishte përdorur polonium-210 radioaktiv, gjurmë të të cilit ishin gjetur në disa zona të Londrës.

Përgjigjja e kryeministrit britanik, David Cameron për këtë ngjarje gjykohet shumë e dobët nga ana e medias së shkruar.

”Times” propozon rritjen e mbrojtjes së disidentëve rusë, të cilët jetojnë në Britaninë e Madhe, ndërkohë që ”Daily Telegraph” dënon faktin që ”rrjeti i agjentëve rusë në Londër është shumë i gjerë, njësoj si në periudhën e Luftës së Ftohtë”.

Në ”Times” botohet edhe një intervistë e Marina Litvinenkos, vejushës së agjentit të vrarë.

Ajo kërkon sanksione ekonomike dhe ndalim të hyrjes në Britaninë e Madhe të disa organizmave dhe individëve, përfshirë presidentin rus, Vladimir Putin /ATSH/