Administrata e Presidentit të SHBA-së, Donald Trump, po i afrohet një operacioni ushtarak kundër Iranit që mund të fillojë "shumë shpejt", raporton media amerikane Axios duke cituar disa burime të administratës amerikane.

Sipas këtyre burimeve, një operacion kundër Teheranit do të merrte formën e një fushate ushtarake në shkallë të gjerë, disa javore, shumë më shumë se operacioni i kryer muajin e kaluar në Venezuelë.

Axios thekson se ky mund jetë një operacion i përbashkët SHBA-Izrael, që synon programin bërthamor dhe raketor të Iranit dhe me implikime potencialisht ekzistenciale për regjimin në Teheran.

Ndërhyrja, për sa i përket shkallës dhe objektivave të saj, do të shkonte edhe përtej luftës dymbëdhjetëditore kundër Iranit të nisur nga Izraeli qershorin e kaluar, së cilës Uashingtoni më vonë iu bashkua për të goditur objektet bërthamore nëntokësore.

Një “luftë në shkallë të plotë” që “zgjat me javë”, raporton Axios, duke theksuar se administrata amerikane aktualisht ka miratuar një qasje “me dy pista”: bisedime për një marrëveshje bërthamore të shoqëruara me një forcim masiv ushtarak. Megjithatë, ndërsa të dyja palët kanë pohuar se bisedimet kanë “bërë përparim”, dallimet janë të mëdha dhe zyrtarët amerikanë nuk janë optimistë për tejkalimin e tyre.

Gjithashtu vihet në pah se si ushtria amerikane në Gjirin Persik është rritur duke përfshirë dy transportues aeroplanësh, anijesh luftarake, qindra avionë luftarakë dhe sisteme të shumta të mbrojtjes ajrore

Sipas Axios, presidenti amerikan thuhet se është “ngopur” me situatën dhe, pavarësisht se disa njerëz përreth tij e “paralajmërojnë” për rreziqet e veprimeve të mundshme ushtarake, probabiliteti i një sulmi në javët e ardhshme është “90%.

Si përfundim, thuhet se “nuk ka prova se një përparim diplomatik me Iranin është në horizont, por ka prova në rritje se lufta është e afërt”.