Shumë fermerë në fshatin Anë Vjosë të Memaliajt kanë hequr dorë nga kultivimi i grurit. Ata thanë se janë skualifikuar padrejtësisht nga skema mbështetëse e subvencioneve në bujqësi edhe pse kanë dorëzuar dokumentet pranë AZHBR-së rajonale.
“Kemi bërë dokumentet jo vetëm unë por dhe të babait, brenda afatit i dorëzuam dhe nuk morëm gjë. Ishin të gjitha mashtrime!. Kisha në plan për të mbjellë 1 ha grurë sepse doli njoftimi se kush mbjell një hektarë grurë do të marrë 300 mijë lek, por aplikova nuk mora gjë ndaj dhe nuk mbolla grurë”, u shpreh një fermer.
“Unë kam aplikuar, kam dal fitues por asnjë lek s’kam marrë. S’di kur do na i japin se iku mbaroi viti, erdhi tjetri”, tha një tjetër fermer.
![]()
Ka nga ata fermerë të cilët janë rikthyer nga emigracioni, por kur konstatojnë padrejtësi, mendojnë sërish largimin nga Shqipëria njësoj si 32 vite më parë.
“Më thanë dokumentet i ke në rregull, por nuk e merr naftën se skadoi afati. Unë i dorëzova në datë 23, ora 12:00 dhe më thanë janë mbyllur aplikimet. Për një orë unë u dogja, nuk mora naftën time as të vëllezerve se ne kemi 7-8 ha tokë. Unë kam punuar 30 vite në Greqi, u ktheva para 5-6 vitesh por sërish mbeta pa bukë, shteti nuk të ndihmon për të zhvilluar bujqësinë dhe jam gati sërish të iki në Gjermani, Suedi e ku të jetë”, tha një fermer.
Për vitin 2022, Ministria e Bujqësisë akordoi një fond prej 500 milionë lekësh subvencion për kultivimin e grurit. Në përfundim të procesit, në tetor 2022 u shpallën 3127 fitues në mbarë vendin, ndërsa numri i aplikimeve ishte 7466 fermerë. Ç’ka do të thotë se gjysma e tyre janë skualifikuar për mungesë dokumentacioni.
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)