Memorandum për regjistrimin
e fëmijëve që jetojnë jashtë

TIRANE- Ministria e Punëve të Jashtme e Shqipërisë dhe Qendra "Shërbimi Ligjor Falas Tiranë (TLAS)", firmosën sot një memorandum mirëkuptimi, që konsiston në nxitjen dhe asistencën për regjistrimin e fëmijëve të lindur jashtë territorit të vendit, të cilët nuk janë regjistruar ende në zyrat shqiptare të gjendjes civile.

Zv.kryeministri dhe ministri i Punëve të Jashtme, Edmond Haxhinasto, tha se marrëveshja ishte "një hap tjetër konkret të rëndësishëm përsa i përket shërbimeve, që MPJ ofron nëpërmjet rrjetit të shërbimit të saj konsullor për qytetarët shqiptarë dhe veçanërisht për ata që i kanë lindur fëmijët e tyre jashtë shtetit dhe kanë probleme me dokumentet e tyre të lindjes".

Haxhinasto tha se po shqyrtohej mundesia e hapjes se  konsullatave të reja veçanërisht në Greqi, ku ka më shumë shqiptarë, por dhe ne vende te tjera.

Me nënshrkimin e këtij memorandumi MPJ angazhohet nëpërmjet përfaqësive konsullore, që mbulojnë rrethin e juridiksionit në të cilin ka lindur fëmija, të kërkojë pranë autoriteteve përkatëse dokumentacionin e nevojshëm për regjistrimin e fëmijëve. Ky regjistrim i fëmijëve do të bëhet pa pagesë pranë zyrave të gjendjes civile.
(atsh.shqiptarja.com)