Menaxheri: Në Itali ngarkesa u
kontrollua,por s’dinim kokainën

Menaxheri i kompanisë “Arbri Garden” Rolando Lushaj dhe shoferi i kompanisë “Pelikani Transport” Armando Pezaku, janë të vetmit të arrestuar nga policia dhe Prokuroria e Krimeve të Rënda, lidhur me sasinë e 613 kg kokainë të bllokuar në Maminas të Durrësit. Të dy këta persona rezultojnë të jenë njerëzit që janë paraqitur në portin e Durrësit, ku kanë tërhequr kontinjerin e mbushur me banane që vinte nga Kolumbia, por që bashkë me sasinë e bananeve në kontinjer ndodhej dhe sasia prej 613 kg lëndë narkotike e llojit kokainë. Gjatë marjes në pyetje të dy personat nuk kanë pranuar akuzën, duke pohuar se ishin thjesht puntorët e biznesmenit Arbër Çekaj.Shoferi Pezaku mësohet tu ketë thënë hetuesve se punon tek kompania “Pelikani Transport”. “Jemi të kontraktuar nga firma “Arbri-Garden” dhe unë isha personi që duhet të merrja kontenierët, pasi më ka marë në telefon duke më urdhëruar që të shkoja aty”.

Dëshmia e menaxherit
Të njëjtën gjë ka pretenduar edhe Lushaj, “…kam kryer procedurat doganore dhe kam shoqëruar mallin në magazine…”.  “…Unë nuk kisha asnjë mundësi të porosisja ngarkesa. Këtë gjë e bënte pronari Arbër Çekaj…”-ka rëfyer më tej menaxheri Rolando Lushaj. Ky i fundit ka pohuar se është punësuar në kompaninë nën hetim “Arbri Garden” në vitin 2014 me detyrë menaxhimin e ngarkesave me agjentët e shitjeve. Ngarkesat porositeshin nga vetë pronari, kryesisht në Kolumbi, Ekuador dhe Argjentinë, ka këmbëngulur Lushaj. I pyetur për rastin e kontejnerit të fundit prej 20 tonë banane të nisur nga Kolumbia, Lushaj shprehet se kjo ngarkesë ishte vonuar dy javë. “…Ne morëm dijeni…”-shprehet 25-vjeçari se kontejnerët po kontrolloheshin në portin e Livornos dhe për këtë arsye mësova se pronarit i erdhi një e-mail që ia kaloi doganës. Donaldo Lushaj kujton se në datën 27 shkurt e ka telefonuar punonjësi i doganës, Arlind Madani, i cili i ka thënë të paraqitej sepse skaneri kishte dhënë sinjal të kuq për ngarkesën dhe pasi është kontrolluar, sipas tij, janë lejuar të vazhdojnë udhëtimin për në Maminas, ku edhe ndodhi bllokimi i kokainës.

Sinjali i kuq
Por ndërkohë në procesverbalin e këqyrjes policia evidenton se pasi skaneri ka dhënë sinjal të kuq, ata kanë parë se pjesa fundore e kamionit në krahun e djathtë ishte pak i hapur, por i mbushur me silikon. Ky detaj lë të kuptohet se dikush para palës shqiptare e kishte kontrolluar kamionin ku edhe ka parë që aty fshihej drogë. Pas kontrollit, policia shpjegon se është urdhëruar dorëzim i kontrolluar për të kuptuar në mënyrë të konfirmuar linjën që do të ndiqte kamioni. Ndërkohë është pyetur edhe shoferi Armando Pezaku qe ka pohuar se ishte caktuar si transportues sipas një grafiku. Burimet pohojnë se dy ditë më parë janë marrë në pyetje edhe përfaqësues të kompanisië së transportit, ndërkohë që Arbër Çekaj vazhdon të jetë në kërkim për trafik ndërkombëtar droge nga Kolumbia në Itali, Maltë dhe mandej Shqipëri.

d.b/shqiptarja.com