Masa shtesë për sigurinë e Altin Dumanit? SPAK: S'ka asnjë mbrojtje të shtuar ndaj tij nga Garda! Drejtuesi i Prokurorisë së Posaçme: S'kam pasur asnjë problem
SPAK ka reaguar në lidhje me një lajm që po qarkullon në mediat se kreu i SPAK, Altin Dumani është marrë në mbrojtje nga Garda e cila ka marrë masa shtesë për mbrojtjen e tij.
Altin Dumani kreu i SPAK
Redaksia 30 Gusht 2023, 12:25 | Përditesimi: 30 Gusht 2023, 14:07
TIRANË- Prokuroria e Posaçme ka mohuar lajmin se për drejtuesin e SPAK, Altin Dumani janë marrë masa shtesë për të ruajtur sigurinë e tij.
Në një njoftim zyrtar për mediat, SPAK thotë se nuk ka asnjë masë shtesë për të garantuar sigurinë e drejtuesit të SPAK, por mbrojtja e tij vijon të kryhet konform procedurave dhe standardeve të miratuar nga Garda e Republikës në bashkëpunim me policinë e Shtetit.
‘Drejtuesi i Prokurorisë së Posaçme mbrohet nga Garda e Republikës e cila bashkëpunon dhe koordinon veprimet me Policinë e Shtetit. Mbrojtja e Drejtuesit të Prokurorisë është konform procedurave standarde të miratuara.’- thekson Garda.
Për gazetaren e Report Tv, Keti Banushi, vetë kreu i SPAK, Altin Dumani tha se s’ka pasur asnjë situatë apo problem që ndaj tij të merren masa të shtuara.
‘S'kam asnjë problem apo situatë! Mbrojtja ime është sipas procedurave standarde.’- tha Dumani.
Edhe ministri i Brendshëm Taulant Balla tha se nuk është në dijeni të ndonjë kërkesë për masa të shtuara për kreun e SPAK, Altin Dumani.
Rendit zhvillimet sipas orarit:
Ora 13:44
Ministri i Brendshëm: S’ka pasur asnjë kërkesë për të rritur sigurinë për Altin Dumanin! Lajmi i pavërtetë
Ministri i Brendshëm Taulant Balla hodhi poshtë zërat se janë shtuar masat për të garantuar sigurinë e kreut të SPAK, Altin Dumanin.
‘Dua të garantoj jo vetëm prokurorët e SPAK gjyqtarët por çdo qytetar të këtij vendi që policia e shtetit është në detyrë për të garantuar që çdo kush të jetë i sigurt. I kam kërkuar Rrumbullakut që të marrë kontakt me Dumanin për të garantuar që policia e shtetit të bëjë detyrën. Deri në momentin që flasim nuk jam informuar se ka një kërkesë apo problematike për Altin Dumanin. Lajmi është i pavërtetë.’- tha Balla.