Mesi kalon Ronaldon, Juve e Bayern
prekin titullin, Arsenali ngjitet i treti

Barcelona vazhdon serinë e fitoreve edhe përballë Eibar duke shmangur surprizat në prag të ndeshjet së kthimit për Champions League përballë Manchester City. Katalanasit janë mjaftuar me dy golat të Mesit ndaj Eibar, i cili kaloi edhe Ronaldon në kampionat duke arritur shifrën e 32 të tillëve brenda edicionit.

Barcelona aktualisht ndodhet 4 pikë para Realit, por të dielën në 21:00 pritet përgjigja e kampionëve të Europës dhe Ronaldos. Ndërsa Atletiko është ndaluar edhe nga Espanjol duke humbur ritmin.

Premier League
Arsenali shpartalloi West Ham 3-0 duke shënuar fitoren e 5 radhazi në kampionat. Autorët e golave për ekipin e Venger ishin Giroud, Ramsey dhe Flamini.

Arsenali me këtë fitore arrin në kuotën e 57 pikëve, dhe renditet në vendin e tretë. Në ndeshjet e tjera që u zhvilluan spikat fitorja e thellë e Aston Villa përballë Sanderland 0-4.
 
Serie A
Juventusi prek titullin e radhës kampion në Itali, duket se nuk do të ketë më histori në Serie A, pasi bardhezinjtë shkëputen +14 pikë nga Roma që mban vendin e dytë. “Zonja e Vjetër” mori maksimumin edhe përballë Palermos jashtë fushe edhe pse iu desh që të priste 70 minuta për t’iu falur golit të spanjollit të dalë nga akademia e Realit të Madridit, Alvaro Morata.

Fitorja qetëson Juventusin në prag të ndeshjes së kthimit për Champions Leaguen ndaj Dortmundit në Gjermani.
 
Bundesliga
Edhe në Gjermani duket se gjithçka është mbyllur shumë javë përpara se të përfundojë kampionati, pasi Bayerni nuk ka rivalë. Verder Bremen ka pësuar humbjen e radhës përballë kampionëve të Gjermanisë em rezultatin e thellë 0-4.

Ekipi i drejtuar nga Guardiola është kthyer në një makineri golash, teksa tashmë përpos shkëputjes me 14 pikë po thellon edhe golavarazhin. Autorët e golave ishin, Levandovski me dopietë, Alaba dhe Muler. Në ndeshjet e tjera Paderboni i Mehës humbi, ndërsa Shalke barazoi.


d.balla/shqiptarja.com