Ky takim nisi rreth orës 14:30 mes dy aleatëve është i dyti pas atij të zhvilluar pak ditë më parë. Këtij takimi rreth një orë më vonë i është bashkuar deputeti PDIU, Aqif Rakipi e më pas edhe ministri i Drejtësisë, Nasip Naço. Ndonëse ka shkuar i fundit në takim, Naço ka qenë i pari që është larguar nga dreka.
Në përfundim të takimit me Shpëtim Idrizin, kreu i Kuvendit Ilir Meta në një prononcim për gazetarët tha se gjatë këtij takimi është diskutuar për Kuvendin dhe për ndeshjen Shqipëri-Serbi. Meta deklaroi se takimet e tij me aleatin e koalicionit qeverisës, PDIU-në, janë në harmoni të plotë me kryeministrin, Edi Rama.
“Jemi në harmoni të plotë me Kryeministrin Edi Rama. Diskutuam për Kuvendin dhe ndeshjen Shqipëri-Serbi”, u shpreh Meta pas takimit me Idrizin.
Një ditë më parë, PDIU e cila për një kohë të gjatë ka qëndruar në aleancë me të djathtët u bë pjesë e qeverisë duke u përfaqësuar në nivel zv.ministri të Jashtëm. Ky është takimi i dytë mes dy aleatëve, brenda pak kohësh. Javën e shkuar, Meta dhe Idrizi u takuan së bashku në një prej restoranteve të kryeqytetit, në një kohë kur LSI i kishte paraqitur kryeministrit kërkesën për ndryshimet në qeveri.
Partia Drejtësi Integrim dhe Unitet është bërë dy ditë më parë pjesë e kabinetit qeveritar, duke marrë një post në nivel zv.ministri. Në vendimin e së mërkurës prej Këshillit të Ministrave, Halil Hyseni është emëruar zv.ministër i Punëve të Jashtme. Hyseni ka qenë më parë ish-shef kabineti i Besnik Mustafait në kohën kur ky i fundit ishte ministër i Jashtëm si dhe ish-shef i Aviacionit Civil.
Bashkë me këtë emërim, Ministria e Jashtme bëhet me tre zv.ministra, pasi aktualisht këtë post mbajnë Selim Belortaja, që përfaqëson LSI-në dhe Odeta Barbullushi që përfaqëson PS-në. Ky është posti i parë që PDIU merr në nivel qeverie, pasi “shpërblimi” i parë që mori duke u bërë pjesë e koalicionit qeverisës ishte emërimi i kreut të saj, Shpëtim Idrizi si nënkryetar i Kuvendit. Ndërkohë, LSI vijon të këmbëngulë se qeveria ka nevojë për impulse të reja, çka do të thotë ndryshime në emrat e kabinetit Rama.
LSI preferon që topin për këtë vendimmarrje t’ia kalojë kryeministrit Rama, dhe nuk specifikon se ku i kërkon ndryshimet, në radhët e ministrave të saj, apo në emrat që përfaqësojnë PS-në. Ekonomia është theksi i parë tek e cila LSI është fokusuar, kur thotë që ka nevojë për energji të re. Meta ka porositur ministrat dhe deputetët e saj të angazhohet për paketën e re fiskale.
Redaksia Online
(f.s/shqiptarja.com)