Meta me gazetarët: Së shpejti të
raportoni për çeljen e negociatave

Në takimin e fundvitit me përfaqësuesit e medias, Kryetari i  Kuvendit, Ilir Meta, uroi gazetarët që vitin e ardhshëm të mund të raportojnë lajmin për hapjen e negociatave për anëtarësimin në Bashkimin Evropian. Në këtë aktivitet ishin të ftuar drejtues të mediave, analistë, gazetarë dhe operatorë, të cilët u bënë pjesë e pritjes së organizuar në Kuvendin e Shqipërisë. Në fjalën e tij përshëndetëse, Ilir Meta i uroi të gjithë të pranishmëve një vit sa më të mbarë. “Kam vetëm një urim për vitin që vjen pasi edhe ju gjatë këtij viti keni pas shumë angazhime sepse edhe parlamenti ka patur mjaft punë, mjaft debate.

I keni pasqyruar, i keni komentuar. I përshëndes të gjithë, pronarët e mediave, analistët, por në mënyrë të veçantë gazetarët edhe ata të terrenit, edhe kameramanët e palodhur dhe ju uroj që në vitin që vjen të përcillni sa më shumë lajme të mira, sa më shumë lajme pozitive, por natyrisht edhe kritika sepse gjithmonë ka vend për përmirësime, ka vend për të reflektuar.

Dhe ju uroj të gjithëve ju një vit më të mbarë!”, - u shpreh Meta. Gjithashtu, Kryetari i Kuvendit uroi që viti 2016 të jetë viti i hapjes së negociatave për anëtarësim me Bashkimin Europian. “Ju uroj gëzuar në familjet tuaja dhe natyrisht të jetë një vit ku të dominojnë lajmet sa më pozitive dhe shpresojmë që të kemi mundësi të japim edhe lajmin për çeljen e negociatave pasi besoj se do të ishte një gjë mjaft e rëndësishme për vendin dhe një hap mjaft pozitiv për të ardhmen”, uroi Meta. Të dielën në takimin e tij me gazetarët, kryeministri Rama u uroi gazetarëve sa më shumë lajme të gëzueshme.

“Mbi të gjitha paçi sa më shumë gëzime dhe lajme të gëzuara! Se për lajmet e pagëzuara kujdeseni vete nga mëngjesi deri në darkë”-tha kryeministri. Ai ndau me ta një përshëndetje mes batutash e thumbimesh, në përgjigje edhe të fjalëve përshëndetëse të gazetarëve të cilët folën në takim. “Unë jam mes jush, tanimë, si kavia kryesore e punës suaj, që duhet të pranoj pa u ndjerë bisturitë, thikat, gërshërët, gjilpërat, turjelat, frezat, sharrat, daltat, çekiçët, acidet, zorrët me presion të lartë e me radhë. Prandaj dhe në fakt e kam bërë një zgjedhje të pa lavdërueshme, për të mos ju lexuar dhe dëgjuar thuajse fare drejtpërdrejtë, duke u mjaftuar me përmbledhjen një faqëshe të zyrës së shtypit, çdo mëngjes”-tha kryeministri. 




Redaksia online
(s.m/shqiptarja.com)