Meta pret në Tiranë ambasadorin
e ri të Britanisë: Urime për detyrën

Kryetari i Kuvendit Ilir Meta priti sot Ambasadorin e ri të Mbretërisë së Bashkuar, Duncan Norman të cilit i uroi mirëseardhjen në Shqipëri dhe suksese në detyrën e re.
 
Kryetari i Kuvendit, Ilir Meta pasi vlerësoi marrëdhëniet historike mes Shqipërisë dhe Mbretërisë së Bashkuar, theksoi se Kuvendi i Shqipërisë dëshiron intensifikimin e shkëmbimeve të gjithanshme mes dy vendeve, duke vlerësuar investimin afatgjatë të Britanisë së Madhe në të gjithë vendet e rajonit tonë.

Në këtë kuadër, u vlerësuan shkëmbimet ndërparlamentare si tepër të rëndësishme për cilësinë e bashkëpunimit dypalësh.
 
Vëmendje e veçantë iu kushtua forcimit të mëtejshëm të bashkëpunimit të ngushtë që ekziston mes dy vendeve në luftën ndaj korrupsionit, krimit të organizuar dhe trafiqeve të paligjshme ku Kryetari i Kuvendit Meta vlerësoi mbështetjen domethënëse britanike.
 
“Britania e Madhe është një partner shumë i rëndësishëm për të gjithë shqiptarët, dhe intensifikimi i këtij bashkëpunimi, do të rrisë edhe besueshmërinë e Shqipërisë ndaj investitorëve britanikë në të ardhmen”, nënvizoi z. Meta.
 
Ambasadori i Mbretërisë së Bashkuar Duncan Norman shprehu kënaqësinë e marrjes së detyrës së re në Shqipëri dhe e informoi Kryetarin e Kuvendit Meta mbi prioritetet e Ambasadës në funksion të bashkëpunimit dypalësh.
 
Ambasadori Norman theksoi se Shqipëria luan një rol tradicional tepër pozitiv në rajon, i cili vlerësohet prej Mbretërisë së Bashkuar, dhe në këtë drejtim, qeveria dhe parlamenti britanik mbeten të përkushtuar ndaj forcimit të marrëdhënieve dypalëshe dhe shumëpalëshe me Shqipërinë dhe me vendet e tjera të rajonit.
 
Në përfundim Kryetari Meta dhe Ambasadori Norman biseduan edhe mbi ecurinë e reformave në Shqipëri, ku theks i veçantë u vendos mbi avancimin e reformës në fushën e drejtësisë, si kyçe për forcimin e sundimit të ligjit në vend dhe për rritjen e kredibilitetit të Shqipërisë në arenën ndërkombëtare.



Redaksia Online
Al.N/Shqiptarja.com