Meta pritet me ceremoni zyrtare nga Presidenti i Rajonit të Siçilisë: Të vendoset një bashkëpunim i veçantë mes nesh

Presidenti i Republikës, Meta u prit sot me ceremoni zyrtare, në Pallatin Qeveritar, nga Presidenti i Rajonit të Siçilisë, Nello Musumeci.

Kreu i Shtetit vlerësoi marrëdhëniet tradicionalisht të shkëlqyera dhe strategjike mes Shqipërisë dhe Italisë, duke vënë theksin në domosdoshmërinë e vendosjes së një bashkëpunimi të veçantë me Rajonin e Siçilisë, sipas modelit të ndjekur me Rajonin e Puljas.

“Së bashku ne ndajmë një vlerë të jashtëzakonshme, me peshë të rëndësishme edhe në historinë politike dhe shtetformuese italiane, Arbëreshët.

LEXO EDHE:
Itali/ U kap duke shitur kokainë, 29-vjeçari shqiptar lirohet pasi pranoi akuzën, dënohet me kusht (EMRI)

Falë statusit të veçantë autonom të Siçilisë, shpresojmë që të bëhet Rajoni i parë në Itali, që mund të miratojë një ligj të posaçëm për mbrojtjen e pakicave linguistike krahinore.

Për Shqipërinë dhe për shqiptarët, mbrojtja e gjuhës, kulturës, traditave dhe trashëgimisë së vyer arbëreshe është me shumë rëndësi.

Modeli i bashkëpunimit me Rajonin e Puljas mund të na shërbejë për të afruar më shumë Siçilinë me Shqipërinë dhe Ballkanin Perëndimor”, – u shpreh Presidenti Meta.

Nga ana e tij, Presidenti i Rajonit të Siçilisë, Musumeci e priti me kënaqësi propozimin e Kreut të Shtetit shqiptar, duke garantuar se do të bëjë të gjitha përpjekjet për vendosjen e një bashkëpunimi konkret me Shqipërinë, si dhe për miratimin e një ligji të posaçëm për mbrojtjen e pakicave linguistike, me qëllim ruajtjen e gjuhës arbëreshe.

Musumeci e konsideroi Komunitetin Arbëresh dhe trashëgiminë e tij të pasur historike dhe kulturore, pjesë të rëndësishme, jo vetëm të identitetit kombëtar shqiptar, por edhe të popullit italian e në veçanti të Rajonit të Siçilisë.

Ndërkohë Presidenti Meta theksoi se: “Komuniteti arbëresh, të cilit Shqipëria dhe shqiptarët i detyrohen për hedhjen e themeleve të Lëvizjes Kombëtare, është projektimi ynë i përbashkët, i shkëlqyer, në Europën e Bashkuar. Ata mbeten modeli ekselent i të qenit pjesë përbërëse e së tërës të bashkuar, duke ruajtur dhe trashëguar karakteristika të identitetit të origjinës historike.”

TAG:
• Ilir Meta
• siçili
• itali