GOLAT/ Milani bën autokritikë, mposht Leccen në udhëtim! Cremonese surpriza e Serie A, vendos stërnipi i Mussolinit

Fillimisht Romano (siç e mban emrin në fanellë dhe numrin 22) asistoi për golin e anuluar të Okerekes, më pas fitoi penalltinë vendimtare për fitoren e Cremoneses 3-2 ndaj Sassuolos.

Nuk mund të kishte një debutim më të mirë në Serie A për Romano Floriani Mussolini, i cili deri më tani ishte komentuar më shumë për mbiemrin e tij sesa për atë që kishte treguar në fushë sezonin e kaluar me Juve Stabia dhe që e bindi Cremonensen ta merrte në huazim me të drejtë blerjeje nga Lazio.

“Për mua mbiemri nuk ka qenë kurrë problem, unë mendoj vetëm për fushën. Ky mbiemër është i rëndë për të tjerët, jo për mua”, është shprehur më parë mbrojtësi.

I futur në vend të Zerbin tetë minuta nga fundi i ndeshjes kundër Sassuolos, djali i ish-senatores dhe deputetes Alessandra Mussolini dhe stërnipi i Benito Mussolinit apo “Duçes”, i lindur në vitin 2003, nuk ndjeu asnjë presion dhe i mjaftoi shumë pak për të lënë gjurmë në ndeshje.

Me topin e parë të prekur, vetëm një minutë pas hyrjes në lojë, kalon Candé dhe i dha Okerekes një pasim që duhej vetëm ta shtynte në rrjetë. Vetëm një kontakt i lehtë mes këmbëve të tij dhe atyre të mbrojtësit të Sassuolos i mohoi gëzimin e plotë, pasi arbitri Guida anuloi golin.

Por Romano, i cili kështu e ka shkruar dhe emrin mbi fanellë, për të shmangur polemikat, nuk u ndikua nga anulimi i golit, pasi në minutën e dytë të shtesës i parapriu Faderës në zonë dhe i dhuroi Cremoneses penalltinë që vlejti për vendin e parë të përkohshëm në renditje.

“Kanë ndodhur shumë gjëra në pak kohë dhe këtë mbrëmje nuk do ta harroj kurrë, sepse debutimin në Serie A e kam ëndërruar gjithmonë”, tha ai menjëherë pas ndeshjes.

“Trajneri më kërkoi të sulmoja hapësirat dhe të shfrytëzoja boshllëqet pas mbrojtjes së Sassuolos. Qëllimi im ishte të bëja diferencën dhe jam i lumtur që ia dola. Për golin e anuluar të Okerekes pata dyshimin se kisha bërë faull dhe për fat të keq arbitri vërtet fërshëlleu, por jam i kënaqur që në fund gjithçka shkoi siç duhej”, u shpreh i riu italian.

Në stadiumin 'Via del Mare', vendasit e Lecces u mposhtën 0-2 nga Milani. Kuqezinjtë vuajtën në pjesën e parë, paçka golit të anuluar për Gabbian që në minutën e katërt, për një faull. Ndeshja për djemtë e Allegrit nuk ishte e lehtë, me minutat që kalonin dhe golin që nuk dukej. Në të 60-n minutë Gimenez shënoi për miqtë, por sërish goli u anulua, këtë herë për një pozicion jashtë loje.

Gjashtë minuta më vonë, veterani Luka Modric asistoi për Loftus-Cheek, me anglezin që e devijoi sferën bukur me kokë dhe e la pas krahëve të portierit Falcone, për t'i dhënë avantazhin kuqezinjve. Milani shtoi presionin dhe katër minuta nga fërshëllima finale gjeti golin e dytë me amerikanin Christian Pulisic. Max Allegri i gëzohet fitores së parë në Serie A pas rikthimit te Milani, ndërsa Ylber Ramadani dhe Medon Berisha ishin në fushë për Leccen.

Në stadiumin 'Giovanni Zini' në Cremona, vendasit e Cremoneses mposhtën 3-2 Sassuolon dhe treguan se jo më kot kanë gjashtë pikë pas dy javëve të para në rikthimin e tyre në elitën e futbollit italian. Trajneri Davide Nicola pa sesi ekipi i tij shënoi dy gola në pjesën e parë me Terraccianon në të 37 minutë dhe Vazquez në të 39 minutë. Vendasit u kapën 'në kurth' nga kjo epërsi dhe lëshuan në lojë, duke u barazuar nga miqtë. Pinamonti në minutën e 63 dhe Berardi me penallti dhjetë minuta më pas vendosën ekuilibrat në 2-2.

Deçizive ishte minuta e 82, kur te vendasit në fushë u fut Romano Mussolini, stërnipi i diktatorit Benito Mussolini. Pas sekonda në fushë dhe ai asistoi për Okerekes, por goli u anulua për pozicion jashtë loje. I riu Mussolini nuk u step dhe në shtesë fitoi penallti për të tijtë, duke bërë që De Luca të mposhtet portierin e Kosovës, Aro Muric. 3-2 dhe tri pikë të tjera për Cremonesen në Serie A, që pret të ketë të gatshëm nga java që vjen edhe sulmuesin veteran Jamie Vardy.