Ministrja Balluku në ministerialin Botëror për Sigurinë Rrugore, angazhime në uljen e aksidenteve

Shqipëria ka bërë një progres të konsiderueshëm në fushën e sigurisë rrugore, ku në 6 vitet e fundit numri i aksidenteve rrugore është ulur me 22%, ndërsa numri i viktimave në 10 vitet e fundit është ulur me 36%. Kjo u vlerësua gjatë ministerialit të 3-të Botëror për Sigurinë Rrugore në Stokholm, ku mori pjesë dhe Ministrja e Infrastrukturës dhe Energjisë, Belinda Balluku.

Në uljen e aksidenteve rrugore kanë ndikuar reformat e thella të ndërmarra nga Drejtoria e Përgjithshme e Shërbimeve të Transportit Rrugor për forcimin e kritereve në procesin e trajnimit dhe të testimit të drejtuesve të mjeteve si dhe ARRSH në eliminimin e pikave të zeza në akset rrugore, projekt ky i mbështetur nga Banka Botërore. Kjo u vlerësua edhe gjatë ministerialit të Stokholmit dhe në takimin që  ministrja Balluku ka zhvilluar me përfaqësues të Bankës Botërore. Gjatë takimit është diskutuar dhe projektin ambicioz i Qendrës së Monitorimit të Trafiku, por dhe projekte të tjera, të cilat do të ndikojnë në përmirësimin e kushteve të sigurisë rrugore.

Ministeriali për Sigurinë Rrugore zhvillohet një herë në pesë vjet dhe i fundit është zhvilluar në 2015 në Brazil. Në konferencën e Stokholmit morën pjesë 1700 delegatë nga 140 vende të ndryshme të botës. Ministeriali i Stokholmit u hap solemnisht nga mbreti i Suedisë, Carl XVI Gustaf dhe ministri suedez i Transportit dhe në të u miratuar një plan veprimi prej 18 pikash, për të reduktuar me 50% fatalitetet dhe dëmtimet nga aksidentet rrugore, gjatë dekadës së ardhshme.

TAG:
• aksident rrugor
• belinda balluku