Madje duket se konfliktet mes drejtuesve të fakulteteve tradicionale të mjekësisë, dhe rektoratit të universitetit të ri të Mjekësisë, janë aq të forta, saqë kanë përfunduar jo vetëm në tryezën e ministrit të Arsimit, por edhe në dyert e gjykatës, ku dekani i Mjekësisë dhe ai i infermierisë, i janë drejtuar gjykatës për të zgjidhur problemet ligjore që kanë me Universitetin e Mjekësisë. Mësohet se në tryezën e ministrit të Arsimit, Myqerem Tafaj, ka shkuar një shkresë zyrtare nga drejtuesit e dy prej fakulteteve të Mjekësisë ku i kërkojnë të rishikohet vendimi për universitetin e Mjekësisë, pasi ata nuk mund ta përballojnë atë.
Ndërkohë që kjo nuk është e vetmja shkresë nga profesorët e këtij universiteti, që ndodhet në Ministrinë e Arsimit. Pas dërgimit nga universiteti i Mjekësisë, për miratim të statutit, në ministrinë e Arsimit ka mbërritur një shkresë tjetër nga fakultetet e Mjekësisë, ku i kërkohet të mos miratohet ky status, pasi nuk janë marrë në konsideratë sugjerimet e tyre. Dhe statusi i Universitetit të Mjekësisë ende nuk është miratuar, por as kthyer mbrapsht.
Vetë dekani i Mjekësisë, Bajram Hysa, në një e-mail që u ka dërguar profesorëve, pas debatit për këshillin e profesorëve, shprehet se rrugëtimi i universitetit të Mjekësisë është i vështirë. ”Fatkeqësisht, të gjitha zhvillimet e mëpasme të rrugëtimit të Universitetit të Mjekësisë, Tiranë, vërtetuan faktin e njohur se fillimet antiligjore dhe të pa studiuara mirë nuk mund të prodhojnë liri akademike dhe zhvillim institucional të qëndrueshëm”, - u ka thënë kolegëve të tij Hysa.
Në vitin 2007, me ligjin e ri të arsimit të lartë, fakultetit të Mjekësisë, iu hoq e drejta për të përzgjedhur shefat e shërbimeve dhe të departamenteve dhe mund të zgjidhnin vetë vetëm dekanin. Ndërkohë që për përzgjedhjen e shefave, u krijua një bord i veçantë në Ministrinë e Shëndetësisë, bord që edhe aktualisht bën përzgjedhjen e shefave të shërbimeve dhe që përbëhet nga Ministri i Shëndetësisë, kreu i ISKSH-së, rektori i Universitetit, dekani i fakultetit të Mjekësisë, kryetari i këshillit të profesorëve të Mjekësisë. Asokohe profesorët e Mjekësisë kundërshtuan fort me pretendimin se u cënohej autonomia, ndërsa kërkuan shkëputjen nga universiteti i Tiranës, dhe krijimin e një universiteti të Mjekësisë.
VKM
Me një vendim të datës 23 janar 2013 u vendos shkëputja e fakulteteve mjekësore nga Universiteti i Tiranës dhe krijimi i Universitetit të Mjekësisë. Sipas këtij vendimi, nga dy fakultete me profil mjekësor që ishin nën varësinë e UT-së, tashmë, kur kishin universitetin e tyre, do të krijohen 5 fakultete. Më parë ishin vetëm fakulteti i Mjekësisë dhe ai i Infermierisë, ndërsa tashmë këto dy fakultete janë ndarë edhe në pjesë të tjera dhe aktualisht universiteti i Mjekësisë përbëhet nga Fakulteti i Mjekësisë; Fakulteti i Mjekësisë Dentare; Fakulteti i Farmacisë; Fakulteti i Shkencave Mjekësore Teknike; Fakulteti i Shëndetit Publik. Që do të thotë se edhe kompetencat e drejtuesve të tyre janë rishpërndarë.
Shkrimi u botua sot në gazetën Shqiptarja.com (print) 21.07.2013
Redaksi Online
(b.m/shqiptarja.com)
![](https://www.shqiptarja.com/template/img/sh_logo1.png)