MZHUT: 7 mln $ për rehabilitimin
e vijës liqenore Lin- Pogradec

TIRANE- Ministria e Zhvillimit Urban dhe Turizmit ka reaguar pas akuzave dhe pretendimeve të ngritura nga Partia Demokratike sa i takon rehabilitimit të rrugës Lin-Pogradec. Ndërsa i cilëson akuzat e PD “një deklaratë dëshpërimi dhe prishjeje imagjinare”, kjo ministri sqaron se për rehabilitimin e vijës liqenore Lin-Pogradec janë investuar 7 milionë dollarë, ndërsa 21 subjektet e shpronësuara përfitojnë mbi 4. 5 milionë dollarë.
 
“Në muajin janar merr jetë projekti i rehabilitimit të aksit përgjatë liqenit të Ohrit, nga Lini në Pogradec. Ky projekt përbën një hap të qenësishëm në projektimin e një zhvillimi të qëndrueshëm të territorit, si dhe identifikon qartë filozofinë e respektimit të trashëgimisë dhe pasurisë natyrore, duke i dhënë fund epokës së tranzicionit kaotik urban. Qeveria, nëpërmjet institucioneve përgjegjëse, po transmeton një qasje tjetër, atë të respektimit të shtetit ligjor, duke shpërblyer çdo person që disponon një titull pronësie, që preket nga ky projekt madhor, pavarësisht si është ndërtuar dhe më pas hipotekuar”, thuhet në njoftimin e MZHUT.
 
Sipas Ministrisë së Zhvillimit Urban dhe Turizmit, ky realizimi i këtij projekti do të bazohet tek zbatimi i të gjitha hapave ligjore.
 
“Projekti si çdo investim publik, prek hapësira të cilat në periudha të ndryshme kohore u janë dhënë individëve për shfrytëzim apo ndërtim përgjatë vijës liqenore, në pjesën dërrmuese në kundërshtim me aktet ligjore të kohës në fuqi, por ky nuk është objekt i punës së komisionit të shpronësimeve të Ministrisë së Zhvillimit Urban dhe Turizmit. MZHUT, si ministri e linjës ndjek zbatimin e këtij projekti dhe për këdo qytetar apo politikan, bën me dije se disa nga hapat ligjorë të ndjekur konkretisht apo për praktika të ngjashme, kanë qenë:
 
1- Ekzistenca e një projekti publik me rëndësi kombëtare apo lokale.
 
a- Projekti është miratuar nga Këshilli Kombëtar i Territorit (KKT) -Rehabilitimi i vijës liqenore Lin – Pogradec.
 
b- Qeveria ka financuar fazën e parë të projektit, paralel me atë të përfundimit të rrugës nacionale Lin- Pogradec, në masën 190 milionë lekë ose gati 2 milionë dollarë. Projekti do të zbatohet nga Fondi Shqiptar i Zhvillimit.
 
c- Nëpërmjet Fondit të Zhvillimit të Rajoneve, Qeveria ka filluar zbatimin e projektit të parë në Komunën Udenisht me rehabilitimin e qendrës së komunës, sheshit në hyrje të saj si dhe një sheshi shumëfunksional në qendër të fshatit, të cilat janë pjesë të fazës së parë të projektit për rehabilitimin e qendrave të banuara përgjatë liqenit të Ohrit, në këtë komunë.
 
2-Ekzistenca e gjurmës së projektit ku janë të vendosura të gjitha objektet që preken nga zbatimi i projektit.
 
a- nga projekti preken 21 objekte dhe jo 53;
 
b- objektet janë mbi 90% objekte shërbimi. Dy që banohen dhe në të njëjtën kohë janë dhe objekte shërbimi, në hipotekë figurojnë pas privatizimit, si objekte shërbimi.
 
3- Mbi bazë të projektit si dhe mbështetur në gjurmën që shtrihet projekti, me urdhër të Ministrit është ngritur grupi i punës, që ka bërë vlerësimet e objekteve në terren.
 
4- Është ngitur Komisioni i shpronësimit me urdhër të Ministres dhe bazuar në ligj, kryesohet nga Zëvendësministri i MZHUT.
 
5- Është lidhur Akt - Marrëveshja me njësinë vendore ku do të zbatohet projekti bazuar në ligjin për shpronësimet si dhe është shpallur lista e të shpronësuarve pranë njësisë- subjekti kërkues dhe zbatues i projektit në bazë të ligjit për shpronësimet dhe VKM -së përkatëse”, vijon sqarimi i MZHUT.
 
Sipas kësaj ministrie, në total janë 21 objekte, deri në momentin e shpalljes së listës, pa administruar kontestimet dhe jo 53 objekte, të cilat janë vlerësuar në masën 4.5 milionë dollarë.
 
“Totali i investimit nga buxheti i shtetit përfshirë dhe fondin për projektin e rehabilitimit, shkon afërsisht në vlerën 7 milionë dollarë. Komisioni i Shpronësimit, ngritur pranë Ministrisë së Zhvillimit Urban dhe Turizmit për të vlerësuar praktikat nëse janë të bazuara në ligj dhe akte nënligjore, fton zotin Spaho të njohë dokumentacionin e cituar më sipër dhe më pas, të bëjë politikë mbi dëshpërimin dhe manipulimin me prishje imagjinare”, vijon njoftimi i MZHUT.
 
Redaksia Online
(e.s/shqiptarja.com)