Ekonomi

Nafta zbret në 65 USD/fuçi, ulet
në çmimin e korrikut të vitit 2009

Nafta bruto amerikane WTI (West Texas Intermediate) ka rënë ditën e sotme nën nivelin e 65 dollarëve për fuçi, niveli më i ulët që nga korriku i vitit 2009. Kjo, pas spekulimeve në bursa se organizata e vendeve eksportuese të naftës OPEK ka vendosur të mos ndërhyjë me ulje të prodhimit të vendeve të saj, duke lënë çmimin të bjerë edhe më tej.

VIDEO

Nafta zbret në 65 USD/fuçi, ulet<br />në çmimin e korrikut të vitit 2009

Redaksia 1 Dhjetor 2014, 13:11 | Përditesimi:

Çmimi i naftës amerikane bruto është ulur në nivelin e korrikut të vitit 2009, në 65 dollarë për fuçi, duke shënuar çmimin më të ulët që prej 5 vjetësh. Megjithatë, kjo ulje drastike çmimi është reflektuar pak në tregun shqiptar. Sipas statistikave që nga janari i këtij viti, nafta në tregun shqiptar ka rënë me 12 lekë për litër, apo me rreth 7%, ndërsa në botë, nafta referencë europiane Brent, ka zbritur nga 105 dollarë për fuçi në rreth 66 dollarë aktualisht , apo thënë ndryshe, me 37për qind.

Venezuela, Irani dhe Iraku, të tre vende të OPEK-ut me prodhim të lartë, propozuan uljen e prodhimit me 30 milionë fuçi në ditë, por vendet e tjera, të udhëhequr nga Arabia Saudite, Katari dhe Abu Dabi vendosën për të kundërtën.

Sipas analistëve, një masë e tillë i shkakton humbje të mëdha Rusisë, kostoja e nxjerrjes së naftës të së cilës është më e lartë se ajo e vendeve arabe dhe ndërmarrjet gjigande të saj ndodhen në situatë të vështirë financiare, me rreth 160 miliardë dollarë borxhe për të shlyer.

Ndërkohë, një arsye tjetër është edhe vendimi amerikan për të lejuar prodhim të naftës e gazit nga shkëmbinjtë e shtufit në SHBA, që rrit shumë prodhimin e këtij vendi, por gjithsesi ka kosto që e nxjerr fitimin në çmime tregu rreth 100 USD, ndërkohë që nafta arabe edhe me 40 USD ka fitim, falë kostos shumë të ulët të prodhimit në shkretëtirë.

Redaksia Online
(e.c/shqiptarja.com)

TAG: