Ndalesa e Nishanit në Kosovë
takohet me liderët e partive politike

Presidenti i Republikës, Bujar Nishani gjatë vizitës së tij 2 ditore në Kosovë zhvilloi takime me Kryetarët e partive parlamentare të AAK-së, Ramush Haradinaj, kreun Nisma-s,  Fatmir Limaj dhe kryetarin e Vetëvendosjes, Visar Ymeri.
 
Kreu i shtetit vlerësoi kontributin dhe angazhimin e të drejtuesve politikë, ndër vite, për zhvillimin e Kosovës. Nishani çmoi në mënyrë të veçantë tejkalimin me shumë dinjitet të sfidës me të cilën u përball Haradinaj gjatë arrestimit në Colmar të Francës.
 
Ai u ndal edhe në domosdoshmërinë e një bashkëpunimi edhe më të ngushtë dhe efikas të institucionalizuar ndërmjet Shqipërisë dhe Kosovës, duke hartuar një platformë konkrete dhe të matshme pune në dobi të qytetarëve dhe të çështjes sonë kombëtare.
 
Presidenti Nishani zhvilloi një takim edhe në Komunën e Prishtinës, ku u takua me Kryetarin Shpend Ahmeti.  Ndërsa në Gjilan kreu  shtetit u shpall  nga kryetari i kësaj komune qytetar nderi. Në fjalën e tij, Nishani  e konsideroi një çast të paharrueshëm marrjen e  këtij titulli
 
Kreu i shtetit u shpreh se do të dëshironte që edhe në Shqipëri të mësonin dhe të nxisin eksperienca pozitive nga këto modele të përparimit, civilizimit dhe përgjegjësive, pa dyshim të ruajtjes së identitet politik të gjithsecilit, por mbi të gjitha vendosjen në themel e orientim të interesave të qytetarëve.
 
“Është koha më shumë se kurrë që me dije, me mençuri me kulturë me emancipim dhe civilizim pro mbi të gjitha me dinjitet dhe integritet ti tregojmë gjithkujt atyre që na duan dhe që nuk na duan, atyre që na mbështesin dhe që tentojnë të na pengojnë se ne jemi një popull i qytetëruar”, tha Nishani.
 
Një ditë më parë Nishani  u takua me presidentin Thaci dhe  për të dy homologët, e ardhmja e Shqipërisë dhe Kosovës ka një rrugë të përbashkët, integrimi europian të cilën nuk mund ta ndalë askush. Ndalesa e Nishani në Kosovë vjen pikërisht vetëm pak kohë pas ii rrëzua qeveria dhe vendi shkon në zgjedhje të parakohshme në 11 qershor.

Redaksia Online
B.B/Shqiptarja.com