Një emigrant i paligjshëm i punësuar nga një bandë kriminale si përkthyes në gjuhën angleze është burgosur për 5 vjet. Shqiptari, Afrim Krasniqi ishte një “ndërmjetës” për mafian shqiptare e cila ndërtoi një perandori kultivimi kanabisi në të gjithë Skocinë me vlerë gati 4 milionë paundë.

29-vjeçari u rekrutua për të ndihmuar pronarët e shtëpive të mashtronin duke i bërë të besonin se ishte një shtetas italian që kërkonte një vend për të qëndruar familja e tij. Në këtë mënyrë banda përdorte prona në Renfrewshire, Edinburgh, Penicuik në Midlothian, Aberdeen, Ayrshire dhe Angus për t’i shndërruar ato në ferma kanabisi.

Krasniqi u kap më vonë pasi u gjurmua në një adresë në kryeqytetin Edinburg. Sipas hetimeve kultivimet e kanabisit kishin një vlerë prej 3.8 milionë paundë. Krasniqi u dënua në Gjykatën e Lartë në Glasgow. Ai më parë kishte pranuar fajësinë në prag të një gjyqi 15-ditor për përfshirje në furnizimin me drogë të klasit B midis marsit 2021 dhe shtatorit 2023.

Gjyqtari Lord Arthurson i tha Krasniqit - i konsideruar si një “hyrës i paligjshëm” në Mbretërinë e Bashkuar që kishte lënë Shqipërinë në vitin 2016 - se ai kishte qenë pjesë e një “ndërmarrjeje kriminale në shkallë të gjerë dhe të planifikuar me kujdes”. Gjyqtari e uli dënimin me burg nga 6 vjet për shkak të pranimit të fajësisë.

Banorët në Aberdeen kishin njoftuar policinë, për shqetësimet në lidhje me një numër pronash në qytet. Oficerët filluan të zbulonin ferma kanabisi brenda tyre. U zbulua gjithashtu se matësit e energjisë elektrike ishin manipuluar.

Prokurori David McLean tha se Krasniqi ishte “përfshirë” në prona pasi kishte përdorur dokumente identiteti të falsifikuara për t’i dhënë me qira ato. Ai ishte lidhur më pas me kultivimin e kanabisit, të cilat përfshinin edhe St Andrews dhe Angus.

Avokati mbrojtës Iain McSporran, i tha gjykatës: Roli i tij ishte në thelb dikush që kishte një njohuri më të mirë të anglishtes sesa disa zotërinj të tjerë shqiptarë, të cilët ishin lëvizësit kryesorë. Ai nuk kishte asnjë rol përtej kësaj, asnjë rol në kultivimin e drogës, por ishte i vetëdijshëm se po lehtësonte një sipërmarrje kriminale.

Ai ishte në vështirësi financiare dhe mori vendimin krejtësisht të gabuar duke u përfshirë. Ai luajti një rol në këtë dhe tani duhet të paguajë çmimin./ The Sun