Ndoka: Përgjimet e SHISH,
joligjore e gjueti “shtrigash”

TIRANE- Nuk është vetëm mazhoranca dhe drejtues të saj kundër përgjimeve të paligjshme të Shërbimit Informativ Shtetëror të drejtuar nga Visho Ajazi Lika, të bëra publike nga mediat dhe në veçanti nga gazeta “Shqiptarja.com”. Kështu, kreu i Partisë Demokristiane aleate e PD-së në opozitë, deputeti Nard Ndoka është shprehur kundër përgjimeve të paligjshme të SHISH, por dhe institucioneve të tjera, duke deklaruar se ato duhet të futen në shinat ligjore dhe të mos përdoren politikisht dhe për gjueti “shtrigash” ndaj kundërshtarëve politikë. “Përgjimet duhet të futen me patjetër në shina ligjore për të evituar njëherë e mirë paligjshmërinë që mund të shoqërojnë këtë element të shërbimit sekrete por dhe të institucioneve të tjera që e kanë këtë tagër.

Mazhoranca e sotme duhet të vendosë standarde të reja”, ka qënë deklarata e kreut të PDK-së, Nard Ndoka, i cili i ka kujtuar mazhorancës së majtë se, sa ishte në opozitë ka akuzuar për përgjime të paligjshme, ndërkohë që tashmë është në pushtet dhe duhet t’i japë drejtimin ligjor këtij elementi. “Mazhoranca ka akuzuar për përgjime të paligjshme kur ishte në opozitë. Çfarë bëhet sot për transparencën dhe për sigurinë e këtyre institucioneve, dhe jo vetëm të SHISH”, thotë kreu demokristian, teksa nënvizon se duhen reforma për të luftuar korrupsionin.

“Korrupsioni është një gangrenë për shoqërinë shqiptare, që s’luftohet e pengohet me përgjime, por me reforma, transparencë dhe zbatim rigoroz të ligjit njësoj për të gjithë”, deklaroi Ndoka, i cili ka bërë thirrje që të marrin fund njëherë e mirë përgjimet joligjore. “Përgjimet më shumë përdoren politikisht, për gjueti 'shtrigash' dhe nënshtrim të kundërshtarëve politikë apo për kapje politike. Duhet të marrin fund njëherë e mirë në Shqipëri përgjimet joligjore, pasi po përdoren politikisht”, tha kreu i PDK-së Noka. Gazeta jonë bëri publike listën e drejtuesve të lartë dhe të ministrave të përgjigjuar nga SHISH i Visho Ajazit. J.Marena

Shkrimi u publikua sot (11.03.2014) në gazetën Shqiptarja.com (print)

Redaksia Online
(d.d/shqiptarja.com)

TAG:
• visho ajazi lika