Ndryshimi i taksimit të biznesit nuk është e vetmja risi që solli muaji prill. Këtij iu shtua edhe llogaritja e re e taksës së pronës, e cila tashmë përllogaritet mbi vlerën e tregut, në bazë të cmimeve të referencës që ka publikuar tashmë qeveria. Familjarët do të paguajnë 0.05% të vlerës së banesës së tyre në vit, një shumë që do të shpërndahet përgjatë gjithë vitit dhe do të mblidhet çdo muaj tek fatura e OSHEE. Për bizneset kjo taksë do të jetë 0.2% e vlerës së ambientit ku ushtrojnë aktivitet dhe do të mblidhet nga nëpunësit tatimorë të puishtetit vendor. Deri më tani taksa e pronës është mbledhur në bazë të sipërfaqes dhe paguhej vetëm nga një pjesë e vogël e qytetarëve. Duke e përfshirë tek fatura e dritave, garantohet që pothuajse të gjithë ta paguajnë.
Qeveria ka përjashtuar nga pagesa e kësaj takes vetëm dy kategori: kryefamiljarët pensionistë dhe familjet me ndihmë ekonomike.
Ndërkohë, nuk është arritur afati për krijimin, deri më 1 prill, të kadastrës fiskale, që do të përcaktonte në mënyrë të hollësishme se sa duhet të paguahet në formën e taksës mbi pronën e patundshme (ndërtesa). Ministria e Financave ka dhënë një afat të ri, muajin shtator. Kadastra fiskale është një projekt ambicioz në reformimin e taksës së pronës, i cili synon t’i sjellë më shumë të ardhura pushtetit vendor. Por parashikohet që vitet 2018 dhe 2019 do të shërbejnë si vite tranzicioni, edhe për edukimin e qytetarëve me formulën e re të taksimit të pasurive të paluajtshme.
Këtë vit, taksimi do të fillojë me ndërtesat, ndërkohë që toka bujqësore dhe toka truall do të taksohet me modelin e vjetër. Taksën për ndërtesën duhet ta paguajnë individët, personat fizikë ose juridikë, vendas ose të huaj, pronarë të pasurive të paluajtshme, pavarësisht nga niveli i shfrytëzimit të këtyre ndërtesave.
Ndërkohë, bashkitë kanë në dorë që të ulin me 30-35% vlerën e taksës së pronës, e cila nga 1 prilli hyri në fuqi me formulën e re, atë të përllogaritjes mbi bazën e vlerës së tregut dhe jo mbi sipërfaqe siç ka qenë deri më parë. Kjo, duke u nisur edhe nga pozicioni edhe nga largësia.
