Negociatat e Bashës, PD-së i
ikin 6 deputetë para zgjedhjeve

TIRANE- Dështimi i aleancave parazgjedhore, tashmë po përkthehet edhe në kosto në numra për opozitën në Parlament. Partia Republikane aleati më i madh në zgjedhjet e përgjithshme të 23 qershorit i Partisë Demokratike, aktualisht në Kuvend ka vetëm një deputet. Agron Duka pas largimit të Ylli Shehut, është i vetmi deputet që vijon të mbajë logon e PR-së, ndërkohë që vetë kreu i kësaj partie, Fatmir Mediu ka dalë nga listat e Partisë Demokratike.

Largimi i dy ditëve më parë i deputeit të PR-së Ylli Shehut, dalë nga listat e kësaj force politike në Tiranë nuk është mirëpritur aspak nga kreu i saj Fatmir Mediu. Nëpërmjet një letre të hapur, Mediu i ka kërkuar ndjesë të gjithë votuesve të djathë për zhgënjimin që mund të kenë pësuar nga ky largim i Shehut duke theksuar se e gjitha është një pazar politik. “Kërkojmë ndjesë të gjithë votuesve të djathtë të Tiranës që zhgënjehen nga soje të tilla dhe për kandidimin nga ana jonë të një njeriu të tillë”, ka deklaruar Mediu, ndërkohë që nuk ka kursyer edhe kritikat ndaj kreut të LSI-së, Ilir Meta.