Negociatat,Lu e Vlahutin te Rama
Basha 90' me ambasadorët e BE

Ambasadorët e SHBA dhe të BE në Tiranë ditën e enjte kanë zhvilluar takime me kryeministrin Rama dhe kryetarin e PD, Basha në përpjekje për të bindur palët për të arritur një marrëveshje. 

Donald Lu zhvilloi dy takime me kryeministrin Edi Rama. Takimi i parë mes Lu dhe Ramës u zhvillua këtë të enjte paradite në Kryeministri, ndërsa i dyti në orën 15:00 në të njëjtin vend, ndërsa tryezës iu bashkua edhe ambasadorja e BE, Vlahutin.
 
Në fokus të takimeve mësohet se është situata politike që po kalon vendi, pasi negociatat tre orëshe një ditë më parë mes Ramës dhe Bashës nuk prodhuan asnjë rezultat.
 
Kjo është hera e parë që ambasadori i SHBA zhvillon dy takime brenda ditës me kryeministrin duke treguar edhe përpjekjet maksimale të Donald Lu për zgjidhjen e ngërçit.

Basha takon ambasadorët e BE, shmang Vlahutin
Ndërkohë, kryetari i PD, Lulzim Basha thirri në një takim në selinë blu për rreth 90 minuta ambasadorët e vendeve të BE në vendin tonë.
 
Në takim mungoi ambasadorja e BE Romana Vlahutin, pasi Basha ka preferuar që të informojë vetë përfaqësuesit e vendeve të Bashkimit Europian në Shqipëri.
 
Kjo nuk është hera e parë që Basha shmang Vlahutin, ndërsa ditët e fundit nuk kanë munguar edhe sulmet ndaj ambasadores së BE nga selia blu.
 
Në fokus të takimit me ambasadorët e BE ishte ngërçi politik dhe gjetja e rrugëzgjidhjeve për daljen nga kjo situatë.

Redaksia Online
l.q/dy.bShqiptarja.com