Lufta, Trump: Irani po shembet financiarisht! Sulmon edhe gazetën Wall Street Journal: Askush nuk mendon se jam idiot! Goditen 3 anije në Hormuz

Delegacioni negociues i Iranit ka vendosur të mos marrë pjesë në bisedimet me SHBA-në në Islamabad këtë të mërkurë. Sipas mediave iranine Shtetet e Bashkuara nuk janë tërhequr nga kërkesat e tyre, të cilat Teherani i konsideron të tepruara.

"Në shkëmbimet e mesazheve ditët e fundit, Shtetet e Bashkuara nuk janë tërhequr nga kërkesat e tyre, të cilat i konsiderojnë të tepërta dhe në kundërshtim me të drejtat themelore të popullit iranian, dhe nuk është bërë asnjë përparim i rëndësishëm në mesazhet e shkëmbyera. Për këtë arsye, Irani më në fund deklaroi sot se, në këto kushte, pjesëmarrja në negociata do të ishte një humbje kohe, pasi Shtetet e Bashkuara do të pengonin arritjen e çdo marrëveshjeje të përshtatshme. Si pasojë, nuk do të mbahet asnjë takim me palën amerikane."

Trump në një status të publikuar në rrjete sociale thotë se heqja e bllokadës amerikane të Ngushticës së Hormuzit do ta bënte të pamundur çdo marrëveshje me Iranin.

"Katër ditë më parë, disa njerëz më kontaktuan dhe më thanë: 'Zotëri, Irani dëshiron ta rihapë Ngushticën menjëherë'. Por nëse e bëjmë këtë, nuk do të ketë kurrë një marrëveshje me Iranin, nëse nuk e shkatërrojmë pjesën tjetër të vendit të tyre, përfshirë udhëheqësit e tyre", shkroi ai.

Trump shtoi se se Irani “po i mbarojnë paratë” dhe “po shembet financiarisht”: kjo është arsyeja pse “ata duan që Ngushtica e Hormuzit të hapet menjëherë, po humbasin 500 milionë dollarë në ditë”.

Nga ana tjetër Trump i është kundërpërgjigjur një pretendimi të Wall Street Journal se Irani e kishte “marrë për budalla” pasi ai zgjati armëpushimin në luftën midis dy vendeve.

Përmes një postimi në rrjetet sociale Trump tha se gazeta e kishte “humbur rrugën e vet dhe askush nuk mendon se është budalla".

Garda Revolucionare e Iranit ka sulmuar tre anije tregtare kontejnerësh teksa po përpiqeshin të kalonin nëpër Ngushticën e Hormuzit, raportoi BBC. E para u godit rreth tridhjetë kilometra larg Omanit, e dyta u qëllua rrteh tetë milje detare në perëndim të Iranit, teksa anija, MSC Francesca me flamur të Panamasë, u shënjestrua rreth gjashtë milje detare larg brigjeve të Iranit, ndërsa po shkonte drejt jugut nga Ngushtica në Gjirin e Omanit.

Irani thotë se nuk i ka kërkuar SHBA-së që të zgjasë afatin e armëpushimit (që përfundonte sot). Ishte Trump që njoftoi zgjatjen e afatit me kërkesë të Pakistanit me qëllim negocimin e një marrëveshje.

Nga ana tjetër Irani bën me dije se nuk ka asnjë formë që në tryezën e bisedimeve të negociohet për programin e tyre bërthamor, edhe nëse SHBA heq bllokadën detare në Ngushticën e Hormuzit.

"Edhe nëse hiqet bllokada, pjesëmarrja jonë në negociata duhet të kushtëzohet nga mosngritja e çështjeve që shkelin pavarësinë dhe dinjitetin tonë, para së gjithash aftësitë tona mbrojtëse dhe raketore, si dhe aftësitë dhe njohuritë tona bërthamore", raportohet në televizionin shtetëror iranian.

Lajmi në përditësim...

Rendit zhvillimet sipas orarit:

Të Fundit Të Parat