Vuajtjet e afganëve për tu larguar nga vendi pasi talebanët erdhën në pushtet, kanë marrë vëmendjen e të gjitha mediave ndërkombëtare. Mbërritja në Shqipëri e një pjese të civilëve afganë, bashkëpunëtorë të SHBA dhe NATO-s ka tërhequr vëmendjen e shumë mediave.
Gazeta prestigjioze amerikane “The New York Times” i ka dedikuar jetës së tyre të re në Shqipëri një reportazh të gjatë, duke treguar sesi ata po përshtaten me një jetë të re dhe sesi po i presin shqiptarët ata.
Reportazhi i cili paraqet situatën e përgjithshme, fokusohet veçanërisht tek strategjia e strehimit të refugjatëve në resortet verore në brigjet e Adriatikut, duke i cilësuar si “kampet e refugjatëve më luksozë dhe të çuditshëm në botë”, të çuditshëm më së shumti nga fakti që Shqipëria mbetet ende, sipas autorit, “një nga vendet më të varfra në Evropë”.
![](https://shqiptarja.com/template/img/NO_ALFA_Kuadrate shqiptarja.png)
Por siç theksohet në shkrim, Shqipëria ka zgjedhur këtë mënyrë strehimi pasi kampet e tjetërsojnë njeriun.
“Ne nuk i vendosim njerëzit në kampe. Ata i tjetërsojnë ata dhe aty ata fillojnë të kenë probleme psikologjike. Ne si komb jemi gjendur shumë herë si ata. Ata thjesht po përpiqen të shpëtojnë nga ferri ” tha kryeministri Edi Rama.
Reportazhi nënvizon gjithsesi që “fatura e refugjatëve paguhet kryesisht nga organizata si National Endowment for Democracy, fondacioni Yalda Hakim, por edhe fondacioni Soros”.
Gazeta amerikane ndjek në veçanti fatin e refugjatëve të strehuar në resortet e Shëngjinit, ku burra e gra afganë duken ende disi të hutuar, peng të kujtimeve dhe frikës për familjarët ende në atdhe.
Përpara se të fluturonte javën e kaluar në Shqipëri, vend për të cilin nuk kishte dëgjuar kurrë, Tahera një studente e mjekësisë kishte shpresuar të arratisej në Shtetet e Bashkuara ose Britani, ku jetonte një xhaxhai saj. Tahera nuk është emri i vërtetë i saj, por ajo ka frikë të tregojë identitetin e vërtetë sepse familja e saj gjendet ende në Afganistan. Tahera, dëshiron të mësojë notin dhe biçikletën, diçka e ndaluar në Kabul. Pushuesit shqiptarë, kryesisht nga Kosova, duket se po i mirëpresin ato, dhe nuk duken të shqetësuar nga prania e tyre.
“Jemi refugjatë luksi. Shkojmë në plazh, shohim vajza gjysmë të zhveshura, flemë dhe hamë rregullisht. Për pjesën më të madhe të njerëzve, kjo është parajsa”, thotë një ish-përkthyes, i cili pohon se pavarësisht komoditetit ende nuk fle nga makthi kur kujton mënyrën si iku nga qyteti i tij Herat, duke iu shpëtuar kontrolleve të talebanëve.
Paqartësia për të ardhmen por edhe për vendin nga i cili kanë ikur të detyruar, zbeh lumturinë e çastit.
“I gjithë ky luks është fantastik, por nuk e shijojmë dot, me gjithë mendimet që kam në kokë”, e përmbledh mirë situatën njëra prej tyre.
Shqipëria, anëtare e NATO-s që dërgoi trupa në Afganistan për t'u bashkuar me përpjekjet e udhëhequra nga Shtetet e Bashkuara për të ndaluar talebanët, ka ndihmuar prej kohësh njerëzit të cilët kanë nevojë për strehim.
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)