Për të 38-ën herë deputetët e zgjedhur të Kuvendit të Kosovës u mblodhën në sallën e seancave plneare. I sotmi, vinte vetëm disa orë pasi Gjykata Kushtetuese u shpreh në lidhje më ngërçin e krijuar me mos konstituimin e Parlamentit. Ajo urdhëroi parlamentarët e dalë nga zgjedhjet e 9 Shkurtit që të konstituojnë institucionin kryesor legjislativ brenda 30 ditëve, duke vijuar me zgjedhjen e kryetarit dhe të nënkryetarëve. 

Kryesuesi i seancës, deputeti Avni Dehari thirri këtë të premte përpara nisjes së seancës, përfaqësuesit e partive politike në parlament, të cilët ranë dakord që ajo të shtyhet për të dielën (29 Qershor), një ditë pasi Kurti dhe krerët e partive politike të kenë zhvilluar bisedime në përpjekje për ta gjetur një marrëveshje politike.

Fituesja e zgjedhjeve të shkurtit, Lëvizja Vetëvendosje, ka të drejtë ekskluzive që të propozojë kandidatin për kryeparlamentar. Subjekti, që udhëhiqet nga Albin Kurti, insiston se Haxhiu është personi i duhur për të udhëhequr Kuvendin. Por, për PDK-në dhe AAK-në, Haxhiu konsiderohet figurë përçarëse, dhe ato kërkojnë që partia e Kurtit të ndryshojë kandidatin.

Mbi katër muaj pas mbajtjes së zgjedhjeve, për shkak të mospajtimit rreth kryeparlamentarit, vendi ka mbetur pa institucione të reja. LDK-ja, që doli e treta në zgjedhje - ka paraqitur një plan me 15 pika për një qeveri uniteti, duke i ftuar të gjitha partitë që ta formojnë një ekzekutiv të tillë, në mënyrë që vendi të dalë nga kriza.

Propozimi është refuzuar nga LVV-ja, ndërsa PDK-ja dhe AAK-ja janë shprehur se preferojnë formimin e një qeverie me partitë që mandatin e kaluar ishin në opozitë - pra, duke përjashtuar LVV-në.

Megjithatë, çështja nuk mund të kalojë te zgjedhja e Qeverisë së re të Kosovës pa u konstituar Kuvendi. Deputetët fillimisht duhet të zgjedhin kryetarin dhe pesë nënkryetarët - për të cilët kërkohen 61 vota - në mënyrë që më pas të hapet rruga për formimin e ekzekutivit.

Rendit zhvillimet sipas orarit:
Ora 10:05
Kushtetuesja tha se Kuvendi duhet të konstituohet brenda 30 ditësh, Kurti: Ftesë kryetarëve të partive për të arritjen e një marrëveshje politike

1750587747_fc7b1af9f6bd4958af4425fb1a1a.jpg

Foto: Albin Kurti

Kryeministri i Kosovës, Albin Kurti, njëherësh edhe kryetar i Lëvizjes Vetëvendosje ka reaguar pas vendimit të Gjykatës Kushtetuese ku Kuvendi duhet të konstituohet brenda 30 ditësh.

Përmes një postimi në rrjetet sociale Kurti shprehet se kjo është një detyrë e i të gjithë deputetëve dhe jo vetëm i subjektit të parë, Lëvizjes Vetëvendosje.

Kurti nënvizon gjithashtu se u ka dërguar ftesë kryetarëve të partive për një takim të shtunën (28 qershor).

"Aktgjykimi i djeshëm i Gjykatës Kushtetuese thekson qartë se obligimi për ta konstituuar Kuvendin është obligim i të gjithë deputetëve dhe jo vetëm i subjektit të parë. Si kryetar i Lëvizjes VETËVENDOSJE! dhe në emër të grupit më të madh parlamentar të dalur nga zgjedhjet e 9 shkurtit 2025, sot u jam drejtuar të gjithë krerëve të subjekteve të përfaqësuara në legjislaturën e nëntë, me ftesë për takim të përbashkët të shtunën (nesër) në orën 16:00, në përpjekje të radhës në funksion të konsensusit për konstituim të Kuvendit", shkroi Albin Kurti.

Xh.K/Shqiptarja.com