Ngjela ‘zbulon’ hallin e rëndë të
Ramës:Po na kujton Enver Hoxhën

Avokati Spartak Ngjela, një zë tepër kritikë i kryeministrit Edi Rama, e ka sulmuar këtë të fundit edhe në lidhje me marrëdhëniet që po vendos me ndërkombëtarët. Duke “zbuluar” hallin e vetëm dhe shumë të rëndë të Ramës, që sipas avokatit është Reforma në Drejtësi, Ngjela shkruan se kryeministri mendon të mundë Uashingtonin dhe Berlinin në Shqipëri me Turqinë dhe Rusinë.

Sipas Ngjelës, Rama duhet të mësojë se gjeopolitika kërkon miliarda si politikë dhe ato sot i ka vetëm Amerika dhe BE. Për këtë, avokati i kërkon Ramës të lërë budallaqet dhe t’i nënshtrohet fatit të tij, sepse Stambolli dhe Moska po tallen me rrugën e zgjedhur prej tij, pasi ata nuk kanë as të dhjetën e parave që ka SHBA-BE.

Postimi i plotë:
Rama me memdjelehtesinë e një profani, por gjithë emocion hoxhist, mendon të mundë Uashingtonin dhe Berlinin në Shqipëri me Turqinë dhe Rusinë. Por kur do të mësojë ky kryeministër i zënë në hall që gjeopolitika kërkon miliarda si politikë dhe ato sot i ka vetëm Amerika dhe Bashkimi Europian!

Kaq i cektët është ky hallexhi që kërkon të shpëtojë veten duke fundosur Shqipërinë? Çështja shqiptare është sot në epiqendër të gjeopolitikës moderne, dhe ketë epiqendër vërtet mendon kryeministri pa mend i Shqipërisë se mund t'ia japë Turqisë dhe Rusisë?

Halli sigurisht që të çon në mendim fëminor, dhe kjo po i ndodh sot edhe kryeministrit shqiptar. Po cili është halli Rama? Është vetëm një dhe shumë i rëndë: kryeministrin shqiptar e kap Reforma në Drejtësi. Po shqiptarët nuk i kanë asnjë faj. Kurse ky zhurmëmadh pa substancë mendore, mendon të shpëtojë me politikë mesjetare.

Që të hyjnë në Shqipëri, domethënë në epiqendrën e gjeopolitikës botërore sot Turqia dhe Rusia, iu duhen minimumi 80 miliardë dollarë. Prandaj Uashingtoni dhe Berlini qeshin ndërkohë me manovrat që po bën kryeministri në hall i Shqipërisë.

Lëri budallallëqet Rama! se ata të dy që ti po kërkon të hyjnë në Shqipëri nuk kanë jo aq para, por as një të dhjetën e tyre. Nënshtroju fatit tënd Rama! se nuk ke rrugë tjetër. Me rrugën tënde Stamboll-Moskë po tallen. Kurse neve këtu na kujton Enver Hoxhën që, për t'i shpëtuar burgut antistalinian, ankoroi Shqipërinë në Kinë. Po ku do t'i gjesh o derëzi gjithë këto miliarda!

Duhet shtuar edhe diçka: Penalizimin i Ramës dhe të gjithë korrupsionit shqiptar, Berisha e të tjerë pas tij, do të krijojë një gëzim të madh në Shqipëri. Në fakt këtu, pas njëqind vjetësh, fillon çlirimi real i Shqipërisë dhe të gjithë botës shqiptare në Ballkanin Perëndimor, të gjymtuar padrejtësisht nga korrupsioni permanent shqiptar dhe akti ahistorik i disa fuqive të mëdha.

Redaksia Online
D.Ç./Shqiptarja.com